बिग्रल संरचना सपरबिः कानूनमन्त्री रावल

पहुरा समाचारदाता
धनगढी, २६ चैत । सुदूरपश्चिम प्रदेशके आन्तरिक मामिला तथा कानूनमन्त्री डा. रणबहादुर रावल नेपालके संविधान रक्षाके बोध करटि प्रतिपक्ष भूमिका निर्वाह करटि करटि फेन सरकारमे प्रवेश करल बटैले बटैं ।

शनिच्चरके रोज धनगढीमे नेपाल प्रेस युनियक कैलाली शाखासे करल नवनियुक्त मन्त्रीहुकनहे बधाई तथा सम्मान कार्यक्रमहे सम्बोधन करटि कानूनमन्त्री डा. रावल देश परिस्थितिहे हेरके संविधान ओ संघीयताके रक्षाके लाग सरकारमे नेपाली काँग्रेसके आवश्यकता महसुस करटि गठबन्धन कैके सरकारमे सहभागी हुइल बटैलैं । उहाँ कलैं, “प्रदेश सरकारके आयु आब कुछ समय किल बाँकी बा, मने नेपाली काँग्रेस छोट समयमे फेन कुछ ना कुछ सकारात्मक काम करि कहिके सरकारमे आइल बा ।” “हम्रे अब्बे चुनौती पूर्ण अवस्थामे सरकार प्रवेश हुइल बटि,” उहाँ कलैं, “यी चुनौतीके बावजुद हम्रे सरकारमे मजा काम करब कना दृढता व्यक्त करटु ।” उहाँ मुलुक राजनीतिक, आर्थिक, सामाजिक रूपमे सफल रहल सन्देश डेनामे अपन पार्टी सक्रिय रुपमे लागल बटैलैं ।

कानूनमन्त्री डा. रावल अपनेहुक्रे सरकारमे आइलबाद सक्कु काम नैकरे सेक्लेसे फेन यी छोट अवधिके परिवर्तनके आभास हुइना मेरिक काम करना बटैलैं । नेपाली काँग्रेस सरकारमे आइलबाद पहिल प्राथमिकता यिहे बैशाख ३० गते हुइना स्थानीय चुनाव सफलता पूर्वक करैनामे रहल उहाँ बटैलैं । जिम्मेवारी पूर्वक काम करलेसे अपनहे फाइदा हुइठ कना ध्यानमे ढैके नेपाली काँग्रेस अपन कार्यसम्पादन सफलता पूर्वक समापन करना उहाँ प्रतिवद्धता व्यक्त करलैं ।

कार्यक्रममे सामाजिक विकासमन्त्री गोविन्द बोहरा राजनीतिक संकटसे राज्य ध्वस्त रहल संरचनाहे नेपाली काँग्रेस सुधारेक लाग सरकारमे आइल बटैलैं । उहाँ कलैं, “मुलुकमे संवैधानिक, राजनीतिक ओ आर्थिक संकट आइल बा । यिहे संकटहे सुधारके लाग नेपाली काँग्रेस सरकारमे आइल बा ।” “हम्रे अपन्ही फेन सजग बटि,” उहाँ कलैं, “हम्रे अपनभित्रे सल्लाह, समन्वय ओ सहकार्य कैके मजा कामहे निरन्तरता डेटि, सुधारके काम करब ।” उहाँ अगामी दिनमे प्रदेश सरकारके नैमजा कदमहे निरुत्साहित कैके आघे बह्रना फेन प्रतिवद्धता व्यक्त करलैं ।

ओस्टेक, कार्यक्रममे सामाजिक विकास राज्यमन्त्री टेकबहादुर रैका काल्हके दिनमे हुइ नैसेकल काम आब नेपाली काँग्रेस सरकारमे आइलबाद हुइना बटैलैं । उहाँ बिगतमे समयमे प्रदेश सरकारके कमि कमजोरीहे सुधार करटि यी सरकार आघे बह्रना बटैलैं । “चार बरससे प्रतिपक्षमे रहिके सरकारके कामहे प्रत्यक्ष मूल्यांकन करले बटि,” उहाँ कलैं, “यिहे मूल्यांकनहे आधारमे नेपाली काँग्रस आघे बह्रि ।” उहाँ अपन मेहनत करके खैना जनताहे सरकार फेन बा कना अनुभूति करैना मेरिक काम करना बटैलैं ।

कार्यक्रममे नेपाल पत्रकार महासंघ सुदूरपश्चिम प्रदेश अध्यक्ष योगेश रावल विगत चार बरससम अंग्रयाइल सरकारके कमिकमजोरीहे सुधार करके आघे बह्रे परनामे जोड डेलैं । उहाँ जनताहे ‘नेपाली काँग्रेस काहे सरकारमे जाइ परना रहे ?’ कना अनुभूति कराइ परना बटैलैं ।

कार्यक्रमे नेपाल पत्रकार महासंघ केन्द्रके लेखासमिति सदस्य मुकुन्द भण्डारी नेपाली काँग्रेस सरकारमे जैना कलेक इतिहाससँग जोरल ओरसे सकारात्मक काम करेपरना बटैलैं । उहाँ कलैं, “यी अन्तिम समयमे बनल सरकारसे भविष्यमे असर करि, टबेमारे यी सरकारहे मजा काम करे परहिस ।”

ओस्टेक, कार्यक्रममे वरिष्ठ पत्रकार मनमोहन स्वाँर अन्तिम समयमे नेपाली काँग्रेस सत्तामे जैना कलेक अवसरसे फेन चुनौती रहल बटैलैं । “आब यी सरकारके करिब ८ महिना काम करे पाइ,” उहाँ कलैं, “यिहे अन्तिम अवधिके नेपाली काँग्रेस सरकारमे जाके चुनौतीहे अवसरके रूपमे परिणत कैके काम करे परहिस ।”

कार्यक्रममे नेपाल पत्रकार महासंघ कैलालीके अध्यक्ष हिमालय जोशी सरकारमे रहल प्रनितिधिहुक्रे नेपाल पत्रकार महासंघसँग फेन समन्वय कैके आघे बह्र परना बटैलैं । ओस्टेक, प्रेस युनियनके केन्द्रीय सदस्य जगत साउँद प्रदेश सरकारके चार वर्षे कार्यकालमे प्रदेशके मन्त्रालय अपन पक्षमे रहल सञ्चार माध्यमहे किल सहयोग करल, मने आब सक्कु सञ्चार माध्यमहे समेटे जाई पर्नामे जोड डेले रहैं ।

कार्यक्रममे नेपाल पत्रकार महासंघ कैलालीके पूर्व अध्यक्ष दीर्घराज उपाध्याय नेपाली काँग्रेस सरकारमे आइलपाछे जनताके काम करे नैसेक्नु कहिके भागे पैना छुट नैरहल बटैलैं । “सरकारमे जाके कौनो फेन बहानामे निस्क्रिय होके भागे नैमिलि,” उहाँ कलैं, “आब काम करना अभिभारा अपनेन्के कँन्धामे आइल बा । यी पूरा करे परि । जनता गुनासो करे नापाए ।”

कार्यक्रममे नेपाल पत्रकार महासंघ बाजुराके अध्यक्ष छक्क मल्ल, प्रेस सेन्टरके केन्द्रीय सदस्य मुकेश टेंर्रा, नेपाल प्रेस युनियक कैलाली शाखाके पूर्व जिल्ला अध्यक्ष टेकराज जोशी, लगायत मन्तव्य व्यक्त करले रहैं ।

नेपाल प्रेस युनियक कैलालीके कोषाध्यक्ष सुनिल आउजी स्वागत करल कार्यक्रम जिल्ला अध्यक्ष श्रवण देउवाके अध्यक्षतामे हुइल रहे । कार्यक्रमके सञ्चालन प्रेस युनियनके सदस्य कृत विष्ट करले रहैं ।