मतदान स्थल ओ मतदान केन्द्रके निरक्षण

अतिसंवेदनशिलमे ५२, संवेदनशिल ५३ ओ १३१ सामान्य मतदान स्थलमे वर्गिकरण

पहुरा समाचारदाता
लम्की, २७ चैत । ५ लाख २५ हजार १२५ मतदाता संख्या रहल कैलाली जिल्लामे २३६ मतदान स्थल ओ ६१९ मतदान केन्द्र निर्धारण करल बा ।

ओम्नेसे अतिसंवेदन शिलमे ५२, संबेदनशिल ५३ ओ १३१ सामान्य मतदान स्थलमे वर्गिकरण करल बा । जिल्ला सुरक्षा समिति कैलालीसे अँटवारके रोज मोहन्याल ओ लम्कीचुहाके टमान मतदान स्थल ओ मतदान केन्द्रके स्थलगत निरक्षण करले बा ।

जिल्लामे रहल सक्कु सुरक्षा निकायके प्रमुख सम्मिलित प्रमुख जिल्ला अधिकारी किरण थापाके नेतृत्वमे रहल सुरक्षा समितिसे मतदान स्थलमे सुरक्षा संबेदनशिलता, निर्वाचनके समयमे अपनाई पर्ना सुरक्षा नीति, मतदाता, उम्मेदार ओ मतपेटीकाके सुरक्षाके सम्बन्धमे स्थलगत अध्ययन करल रहे ।

जिल्लामे रहल मतदान स्थलहे सुरक्षाके दृष्टिकोणसे कटराके संवेदनशिल बटै । कौन मतदान स्थलमे कटरा सुरक्षाकर्मी परिचालन कैना कना विषयमे जिल्लाके टमान स्थानमे अनुगमन हुइटी रहल कैलालीके प्रमुख जिल्ला अधिकारी किरण थापा बटैलै । जिल्लाके सबसे सुरक्षा संवेदनशिल ओ जटीलता मोहन्याल गाउँपालिकामे रहल बटैटी प्रमुख जिल्ला अधिकारी थापा मतदान पाछे मतपेटीके समयमे संकलन कैना सोल्टामे हेलिकप्टर ल्याण्ड करेक लाग समेत अध्ययन तथा अनुगमन करल बटैलै ।

अनुगमनके क्रममे जिल्ला प्रहरी कार्यालय कैलालीके प्रमुख प्रहरी उपरिक्षक विश्व अधिकारी शान्तिसुरक्षा सामान्य रहल बटैलै । निर्वाचनहे शान्तिपुर्वक ओ भयरहित बनैना एकिकृत सुरक्षा बनाके लैगिल बटैलै ।

जिल्ला निर्बाचन कार्यालय कैलालीके प्रमुख निर्वाचन अधिकृत प्रेमराज भट्ट आसन्न बैशाख ३० गते हुई जैटी रहल स्थानीयतहके निर्वाचनहे भयरहित ओ मर्यादित रुपमे सम्पन्न कैना अपनेहुक्रे लागल बटैलै ।

जिल्लाके १३ स्थानीयतहमे मतदान स्थल ओ मतदान केन्द्र तोक्न, जिल्ला स्थित सुरक्षा समितिसे निरक्षण कैना, सुरक्षाके हिसाबसे सामान्य, संवेदनशिल ओ अतिसंवेदनशिलके रुपमे वर्गिकरण कैना, सक्कु पालिकामे प्रमुख निर्वाचन अधिकृतके कार्यालय सञ्चालन कैना, कर्मचारीके खटनपटन ओ तालिम तथा अभिमुखिकरण डेना काम हुइटी रहल कैलालीके प्रमुख निर्वाचन अधिकृत प्रेमराज भट्ट बटैलै ।

जिल्ला सुरक्षा समितिके संयोजक समेत रहल प्रमुख जिल्ला अधिकारी किरण थापाके नेतृत्वमा जिल्ला प्रहरी कार्यालय कैलालीका प्रमुख प्रहरी उपरिक्षक विश्व अधिकारी, सेनानी दिनेश थापा, जिल्ला निर्वाचन कार्यालय कैलालीके प्रमुख प्रेमराज भट्ट, राष्ट्रिय अनुसन्धान विभागके रमेशसिंह डांगा, शसस्त्र प्रहरीके शसस्त्र प्रहरी उपरिक्षक धनबहादुर सिंह, जिल्ला प्रशासन कार्यालयके प्रशासकीय अधिकृत शिवराज जोशी, जिल्ला स्वास्थ्य कार्यालय कैलालीके प्रमुख लालबहादुर धामी लगायतकाके टोली मतदान स्थल ओ मतदान केन्द्रके स्थलगत निरिक्षण करल हो ।