चुनावमे महिलाके अर्थपूर्ण नेतृत्वके लाग ध्यानाकर्षणपत्र
पहुरा समाचारदाता
धनगढी, २९ चैत । स्थानीय तह निर्वाचनमे महिलाके उम्मेदवारी समावेशी ओ नेतृत्व तहमे सुनिश्चित करुवाइक लाग नागरिक संजालसे राजनीतिक दलहुकनहे नागरिक घोषणापत्र/ध्यानाकर्षण पत्र बुझागिल बा ।
नागरिक संजालसे मंगरके रोज नेपाली काँग्रेस, नेकपा एमाले, नेकपा एकिकृत समाजवादी, नेकपा माओवादी केन्द्र, जनता समाजवादी पार्टीके प्रदेशसे लेके जिल्ला कमितिमे नागरिक घोषणापत्र/ध्यानाकर्षण पत्र बुझागिल हो । महिला, दलित, सिमान्तकृत समुदायके स्थानीय तहके निर्वाचनमे समानुपातिक समावेशी नेतृत्वमे सहभागी करैना उद्देश्यसे नागरिक घोषणापत्र÷ध्यानाकर्षण पत्र बुझागिल दलित महिला अधिकार मञ्च नेपालके अध्यक्ष सावित्रा घिमिरे बटैली ।
नागरिक घोषणापत्र/ध्यानाकर्षणपत्र ओरेक नेपाल, दलित महिला अधिकार मञ्च नेपाल, सुदूरपश्चिम समाज, पिसविन, तारङीनी फाउण्डेशन, डब्लुएचआरडी, एनजिओ फेडरेशसन लगायत दर्जनौ संस्थासे राजनीतिक दलहुकनके प्रदेशसे लेके जिल्ला कमितिमे नागरिक घोषणापत्र/ध्यानाकर्षण पत्र बुझैले बा ।
तुलनात्मक रुपमे हेरेबेर २०७४ के स्थानीयतहके निर्वाचनमे १ लाख ४८ हजार ३६४ जाने उम्मेदवारी डेहल मन्से ६१.०१ प्रतिशतपुरुष ओ ३८.९८ प्रतिशत महिलाके सहभागिता रहे । निर्वाचित ३५ हजार ३४ जाने जनप्रतिनीधि मन्से ५९.०४ प्रतिशतपुरुष ओ ४०.९६ प्रतिशत महिला रहिट । समग्रमे स्थानीयतहके निर्वाचन महिलाहुक्रे ४० प्रतिशत सहभागिता सुनिश्चित करल रहे । जम्मा निर्वाचित प्रतिनीधि मन्से १८.७५ प्रतिशत दलित महिलाके उपस्थिती रहे । मने निर्णायक तहमे पुरुषके बाहुल्यता रहल बा ।
ध्यानाकर्षणपत्रमे नेपालके संविधानके धारा ३८ के उपधारा ४ मे मौलिकहकके रुपमे रुपमे व्यवस्था करल अनुसार राज्यके सक्कु संरचनामे महिलाके समानुपातिक समावेशी नेतृत्व अनिवार्य रुपमे सुनिश्चितके पर्ना, महिला महिलाभिटरके बिभिधताहे (दलित, जनजाति, यौनिक तथा लैंगिक अल्पसंख्यक, अपागंता आदि)सम्मान ओ स्वीकार करके उहे अनुसारके सहभागिता ओ निर्णायक तहमे प्रतिनिधित्व सुनिश्चितताके लाग अनिवार्य राजनीतिक दलहुकनके बिधानमे व्यवस्था करके कार्यन्वयनमे नाने पर्ना माग करल करल बा ।
स्थानीयतहके निर्वाचनममे महिलाके नेतृत्वदायी पद सुनिश्चितताके लाग उहे अनुसार राजनीतिक दलसे बिना कौनो शर्त महिलाके उमेद्वारी मनोनय नइहुइना ब्यवस्था करे पर्ना, निर्वाचनके लाग उमेद्वारी सिफारिस करेबेर चर्को शुल्क लेना बाट पार्टीके विद्यान विपरित हुइना ओरसे उ अभ्यास खारेज हुई पर्ना, निर्वाचन नियमावली ओ संविधानमे हुइल व्यवस्था विपरित कौनोफे राजनितिक दल महिलाहुकनके प्रतिनिधित्व घट्न करके सिफारिस करे नइहुइना, सक्कु राजनितिक दलसे महत्वकांक्षीके भरमे उमेद्वारी सिफारिससेफे अनुभवी, योग्यता ओ क्षमताके निश्चितमे पदन्द तयार करके कार्यन्वयन करे पर्ना लगायत माग रहल बा ।
