कृष्णपुरमे बडघर ओ भलमन्साके लाग पाँच लाखके अक्षय कोष

पहुरा समाचारदाता
कञ्चनपुर, ३ वैशाख । कृष्णपुर नगरपालिकासे थारु समुदायके अगुवाइ करुइया बडघर ओ भलमन्साके नगरस्तरीय समितिके लाग पाँच लाखके अक्षय कोष स्थापना करल बा ।

बडघर भलमन्सा समितिहे संस्थागतरुपमे कार्य आघे बह्रैना सहयोग पुगाइक लाग अक्षय कोष स्थापना करल हो । कोषके रकमके व्याजसे बडघर भलमन्सासे आयोजना कैना सामाजिक कार्यसँगे बैठक, छलफल, सांस्कृतिक समारोह, कलासंस्कृति जगेर्ना कैना कार्यमे सहयोग पुगैना नगर प्रमुख कर्णबहादुर हमाल बटैलै ।

“सामाजिक ओ सांस्कृतिक समारोह आयोजना कैना आवश्यक रकमके चाँजोपाँजो मिलाइक लाग सहयोगी संस्था खोजे पर्र्ना अवस्था रहल रहे”, उहाँ कहलै, “इहे आर्थिक समस्याहे मध्यजनगर कैके कोष स्थापना करल हुइटी, इहीसे बडघर भलमन्सा लाभान्वित हुइना विश्वास लेले बाटी ।”

थारु समुदायमे बडघर गाउँके सामाजिक रीतितिथि मिलैना कार्यसँगे सांस्कृतिक कार्यक्रमके आयोजना कैना, वैवाहिक, धार्मिक कार्यमे सघाउ पुगैना करठै । अंशबण्डा, जग्गाके साँध सिमानाके विवाद मिलैना कार्य बडघर करठै । थारु समुदायमे बडघर ओ भलमन्साके स्थानहे महत्वपूर्ण मानजाइठ् ।

नगरपालिका क्षेत्रमे रहल ७२ बडघर भलमन्सा समितिके कार्यहे आघे बह्राइक लाग १० लाखके कुर्सी वितरण करल बा । प्रत्येक समितिहे १५ के दरसे कुर्सी वितरण करल हो ।