जिम्मेवारी पूरा कैना आयोग तत्परः आयुक्त तुलाधर

पहुरा समाचारदाता
धनगढी, ३ वैशाख । निर्वाचन आयुक्त डा. जानकी तुलाधर संविधानसे तोेकल जिम्मेवारी पूरा कैना निर्वाचन आयोग सदैव तत्पर रहल बटैले बटी ।

आयोगसे शनिच्चरके रोज धनगढीमे आयोजना करल मिडिया अभिमुखीकरण कार्यक्रमके उदघाटन करटी उहाँ आयोग अपन जिम्मेवारी पूरा कैना तत्पर रहल बटैली ।

आयुक्त तुलाधर स्थानीय तहके निर्वाचन सफल रुपसे सम्पन्न कैना आयोग तालिकानुसार आघे बह्रटी रहल बटैली । ‘सक्कु जे एकताबद्ध हुके यी निर्वाचन सफल पारे परी, उहाँ कहली,‘ बदर मत सख्या घटैना आयोगसे मतदाता शिक्षा कार्यक्रमहे प्रभावकारी ढंगसे आघे बह्रैना उहाँक कहाई रहे । निर्वाचन सफल पारेक लाग सञ्चार जगतके भूमिका महत्वपूर्ण रहन आयुक्त तुलाधार चर्चा करली ।

आयोगके उपसचिव सूर्यप्रसाद अर्याल मतपत्रबारेमे जानकारी करैले रहिट । स्थानीय तहके निर्वाचन निर्देशिकाअनुसार मतपत्रमे चुनाव चिन्ह राखल उहाँ बटैलै । ‘छ नम्बरसम राष्ट्रिय मान्यता प्राप्त दलहुकनके चुनाव चिन्ह ओ २४ से उपरान्त स्वतन्त्र उम्मेदवारके लाग चुनाव चिन्ह धारके मतपत्र छपाई हुइल बा, उहाँ कहलै । और साल जैसिन मतदाता शिक्षा कार्यक्रम कम रहल मने मिडिया परिचालनमे जोड डेना उहाँ बटैलै ।

प्रेस काउन्सिल नेपालके सदस्य हरिप्रसाद जोशी सञ्चार जगत ओ पत्रकारसे पालना करे पर्ना आचारसंहिता बारेमे प्रस्तुति करल रहिट । उहाँ सक्कु राजनीतिक दलसंग खुला ओ तटस्थ रहिके सूचना सम्प्रेषण कैना पत्रकारहे आग्रह करैलै ।
ओस्टेक करके मत बदर सख्या घटैना मतदाता शिक्षाके रुपमे काम कैना पत्रकारहे आग्रह करलै । ‘निर्वाचनमे सञ्चारके भूमिका मतदाता, आयोग ओ दलबीच पुलके काम कैना हो’, उहाँ कहलै । कौनोफे दल, नेताके पक्षमे लबिङ कैना आचारसंहिताके उलंघन रहल उल्लेख करटी सदस्य जोशी ओसिन नइकैना पत्रकारहे आग्रह करलै ।

जिल्ला निर्वाचन कार्यालय कैलालीके प्रमुख निर्वाचन अधिकृत प्रेमराज भट्ट कैलालीमे ५ लाख २५ हजार १२५ मतदाता संख्या, २३६ मतदान स्थल ओ ६१९ मतदान केन्द्र निर्धारण करल बटैलै । ओम्नेसे अतिसंवेदन शिलमे ५२, संबेदनशिल ५३ ओ १३१ सामान्य मतदान स्थलमे वर्गिकरण करल उहाँ बटैलै ।

जिल्लाके १३ स्थानीयतहमे मतदान स्थल ओ मतदान केन्द्र तोक्न, जिल्ला स्थित सुरक्षा समितिसे निरक्षण कैना, सुरक्षाके हिसाबसे सामान्य, संवेदनशिल ओ अतिसंवेदनशिलके रुपमे वर्गिकरण कैना, सक्कु पालिकामे प्रमुख निर्वाचन अधिकृतके कार्यालय सञ्चालन कैना, कर्मचारीके खटनपटन ओ तालिम तथा अभिमुखिकरण डेना काम हुइटी रहल कैलालीके प्रमुख निर्वाचन अधिकृत भट्ट बटैलै ।