९ महिनामे १ हजार ९२ मुद्दा दर्ता
लागु औषध ४६.०५ प्रतिशतसे बृद्धि
पहुरा समाचारदाता
धनगढी, ५ चैत । कैलाली जिल्लामे चालु आर्थिक बर्ष २०७८/०७९ के ९ महिनामे १ हजार ९२ मुद्दा दर्ता हुइल बा ।
गैल आर्थिक बर्ष ९ महिनामे १ हजार २४ मुद्दा दर्ता हुइल रहे ओकर तुलना कलेसे ६.६३ प्रतिशतसे बह्रल प्रहरी नायव उपरिक्षक वेद प्रकाश जोशी बटैलै । गैल आर्थिक बर्षके ९ महिनाके तथ्याङक हेरेबेर लागु औषधके मुद्दा दर्ताफे ४६.०५ प्रतिशतसे बृद्धि हुइल उहाँ जनैलै ।
चालु आर्थिक बर्षके ९ महिनामे लागु औधष शिर्षकमे १ सय ११ ठो मुद्दा दर्ता हुके ९ महिला, १६१ जाने पुरुष करके १७० जाने पक्राउ करके अनुसन्धान कैगिल,’ उहाँ कहलै, ‘गैल आर्थिक बर्षके ९ महिनामे यी शिर्षकमे ७६ ठो मुद्दा दर्ता हुके ४ महिला, ९७ जाने पुरुष करके जम्मा १०१ जनहनहे पक्राउ करके अनुसन्धान कैगिल रहे ।’ उमेर समुहके तुलना करेबेर १५–२५ बर्ष उमेर समुहके व्यक्ति ढेर रहल प्रहरी नायव उपरिक्षक जोशी बटैलै ।
नौ महिनाके अवधिमे २४८ ग्राम ७८१ मिलि ग्राम खैरो हेरोईन, ७८३ ट्याब्लेट नाईट्राभेट, ७४१ क्याप्सुल स्पास्मो, ४१ किलो ५७ ग्राम ७९७ मिलिग्राम चरेश, ८० क्याप्सुल नाईट्राजपाम,२३ थान प्रोवेल स्पान, २८.०२ ग्राम गाँजा ओ ८ थान तारामाडोल बरामद करल उहाँ जनैलै ।
चालु आ.व.के ९ महिनामे अदालतसे फैसला हुके फरार रहल प्रतिवादी ६६ जाने ओ अनुसन्धानके क्रममे फरार रहल २५ जाने करके ९१ जाने फरार प्रतिवादीहुकन पक्राउ कैगिल बा ।
गैल आर्थिक बर्षके ९ महिनामे अदालतसे फैसला हुके फरार रहल प्रतिवादी ४८ जाने ओ अनुसन्धानके क्रममे फरार रहल २२ जाने करके जम्मा ७० जाने फरार प्रतिवादी पक्राउ करल रहे यी संख्या ३० प्रतिशतसे बह्रल बा,’ प्रहरी नायव उपरिक्षक जोशी कहलै ।
प्रहरी नायव उपरिक्षक जोशी कहलै, ‘राजश्व संकलनफे गैल बरसके नौ महिनाके तुलनामे २३.७६ प्रतिशतसे बह्रल बा । चालु आ.व.के ९ महिनामे भन्सार छली, चोरी निकासि तथा पैठारी नियन्त्रण करके रु.१ करोड २० लाख ७५ हजार ८८० रुप्या राजश्व संकलन करल बा, ओम्ने संलग्ना १२ जाने मनै पक्राउ ओ १० ठो सवारी साधन नियन्त्रणमे लेगिल बा ।’
गैल आ.व. के ९ महिनामे ९७ लाख ५६ हजार ८९८ रुप्या राजश्व संकलन करल ओ ८ जाने मनै पक्राउ, १७ ठो सवारी साधन नियन्त्रणमे लेहल रहे ।
चालु आ.व.के ९ महिनामे कर्तव्य ज्यान सम्बन्धि मुद्दामे १४ ठो मुद्दा दर्ता करल बा कलेसे गैल आर्थिक वर्षके ९ महिनामे १२ ठो मुद्दा दर्ता करल बा । यी संख्या १६.६६ प्रतिशतसे घटल जिल्ला प्रहरी कार्यालय कैलाली जनैले बा । यी अवधिमे अपराधमे संग्लग्न ७२ जाने महिला ओ १०९१ जाने पुरुष करके जम्मा ११६३ जनहनहे पक्राउ करके अनुसन्धान कैगिल बा ।
समुदाय–प्रहरी साझेदारी अवधारणा अन्तर्गत “हाम्रा प्रहरी सग हामी“ कार्यक्रम तथा “हाम्रा सन्ततिको भविष्य बचाउ“ अभियान अन्तर्गत टमान विद्यालय तथा अन्य स्थानमे ४ सय ४० ठो जनचेतनामुलक कार्यक्रम संचालन करल प्रहरी नायव उपरिक्षक वेद प्रकाश जोशी बटैलै ।
