मुख्यमन्त्री राष्ट्रिय पुरुष कबड्डीके उपाधि आर्मीहे
पहुरा समाचारदाता
धनगढी, ७ वैशाख । मुख्यमन्त्री राष्ट्रिय पुरुष कबड्डी प्रतियोगिताके उपाधि विभागीय टोली नेपाल आर्मी क्लब जिटले बा । बुधके रोज हुइल फाईनलमे औरे विभागीय टोली नेपाल एपिएफ क्लबहे हटाके आर्मी उपाधि जिटल हो ।
देशके सर्वाधिक धनराशीके मुख्यमन्त्री राष्ट्रिय पुरुष कबड्डी प्रतियोगिताके उपाधि भिडन्तमे आर्मी एपिएफहे ४०–१६ ले हटाइल । कैलाली जिल्ला कबड्डी संघके आयोजनामे धनगढीमे हुइल प्रतियोगिताके उपाधिसँगे आर्मी नगद एक लाख ५० हजार पुरस्कार पैले बा ।
उपविजेता एफिएफ नगद ८० हजारमे चित्त बुझैले बा । सेमीफाइनल पुगल दुई टोली सुदूरपश्चिम प्रदेश ओ लुम्बीनी प्रदेश तेसर स्थान प्राप्त करले बटैं । दुनु टोली ४०/४० हजार रुपैयाँ प्राप्त करले बटैं ।
सुदूरपश्चिम खेलकुद परिषद् मुख्य प्रवर्द्धक रहल प्रतियोगिताके विजयी खेलाडीहुकनहे एक कार्यक्रमके बीच पुरस्कार वितरण करल बा ।
सुदूरपश्चिम प्रदेश सरकारके सामाजिक विकास मन्त्री गोविन्द बोहोराके प्रमुख आतिथ्यतामे हुइल कार्यक्रमके विशिष्ठ अतिथि सुप प्रदेश खेलकुद परिषद्का सदस्य सचिव दीपकबहादुर सिंह रहैं । कैलाली जिल्ला कबड्डी संघके अध्यक्ष कमल पन्तके अध्यक्षतामे कार्यक्रम हुइल रहे ।
