वित्तीय साक्षरता ओ मनोसामाजिक परामर्श कक्षा
पहुरा समाचारदाता
सुखड, १० वैशाख । कैलालीके घोडाघोडी नगरपालिकामे सुरक्षित आप्रवासन कार्यक्रम (सामी) हेल्भेटास स्वीस ईन्टरकोपरेशन नेपालके सेवा प्रदायक संस्था ट्रेस नेपालसे सञ्चालन करल वित्तीय साक्षरता ओ मनोसामाजिक परामर्श कक्षा समापन हुइल बा ।
वैदेशिक रोजगारमे रहल व्यक्तिनके परिवारके लाग सञ्चालन करल वित्तीय साक्षरता ओ मनोसामाजिक परामर्श कक्षा शनिच्चरके एक कार्यक्रमके बिच सहभागीहे प्रमाणपत्र वितरण कैके समापन करल बा ।
घोडाघोडी नगरपालिकाके शिक्षा शाखाके बिनी तथा सामी फोकल पर्सन उमेश राज रेग्मी वित्तीय साक्षरता ओ मनोसामाजिक परामर्श कक्षाके सहभागी महिलाहे प्रमाणपत्र वितरण करल रहिट । वित्तीय साक्षरता कक्षा वडा नम्बर १, २, ४ ओ ९ मे लागु हुइल रहे । समूह गठन कैके कक्षा सञ्चालन करल रहे ।
वैदेशिक रोजगारीमे गैल परिवारके सदस्यहे गरिबी तथा समृद्धिके अवधारण सँग सुसूचित करैना, वित्तीय साक्षरताके ज्ञान तथा सिप प्रदान कैके पारिवारिक बजेट, आम्दानी तथा खर्च व्यवस्थापन करे लगाके बचत वृद्धि प्रवर्द्धन कैना बारे सिकाइल सुरक्षित आप्रवासन (सामी) परियोजना कैलालीके संयोजक दिपक बोहरा बटैलै ।
ओकर साथे उपलब्धि वित्तीय स्रोत, साधन ओ प्रविधिहे समुचित परिचालन कैके आयमूलक क्षेत्रमे लगानी प्रवर्द्धन कैके दीर्घकालीन समृद्धिओर उन्मुख कैना, बैदैशिक रोजगारमे गैल परिवारके सदस्यहे आपन परिवार व्यवस्थापन कैटी बैदेशिक रोजगारीसे सृजना कैना मनोसामाजिक समस्या समाधान कैना सहयोग मिलल् उहहाँ बटैलै ।
कक्षासे वैदेशिक रोजगारीमे गैल ओ जैना तयारीमे रहल व्यक्ति तथा परिवारके सदस्य लाभान्वित हुइल बाटै । परियोजनाके कारण लक्षित वर्ग सही सूचना पैनाके साथे कामदार तथा परिवारके आर्थिक सामाजिक सुदृढीकरण एवं सीप ओ उद्यमशीलतामे पहुँच बह्रल (सामी) परियोजना जनैले बा ।
स्वीस ओ नेपाल सरकारके द्विपक्षीय परियोजना हो । इ परियोजना श्रम रोजगार तथा सामाजिक सुरक्षा मन्त्रालय अन्र्तगत स्थानीय सरकारके नेतृत्वमे हेल्भेटास नेपालके प्राविधिक सहयोगमे ट्रेस नेपालसे कैलाली जिल्लामे काम कैटी रहल बा । इ परियोजना धनगढी उपमहानगरपालिका, टीकापुर, घोडाघोडी नगरपालिका ओ जानकी गाउँपालिकामे सञ्चालित रहल बा । वैदेशिक रोजगारीहे सुरक्षित, मर्यादित ओ लाभदायक बनैना उद्देश्यसे इ परियोजना काम कैटी रहल बा ।
