कैलालीमे सुरक्षा व्यवस्थापन चुस्त

पहुरा समाचारदाता
धनगढी, १५ वैशाख । आसन्न स्थानीय तहके चुनावहे शान्तिपूर्ण, स्वच्छ, निष्पक्ष ओ भयरहित वातावरणमे सम्पन्न कैना कैलाली जिल्लामे सुरक्षा व्यवस्थापन चुस्त ओ सुदृढ बनाइल बा ।

स्थानीय तह निर्वाचन एकीकृत जिल्ला सुरक्षा योजनाबमोजिम जिल्लाके भौगोलिक विकटताके साथे सडक सञ्जाल ओ सञ्चारके असुविधाहे समेत आधार मानके ठाउँअनुसार निर्वाचन सुरक्षा योजना कार्यान्वयन करे लागल प्रमुख जिल्ला अधिकारी किरण थापा जानकारी डेलै । “निर्वाचनहे शान्तिपूर्ण, निष्पक्ष, स्वच्छ ओ भयरहित वातावरणमे सम्पन्न कराइक लाग सुरक्षाके सक्कु उपाय ओ रणनीतिमे काौनो कसर बाँकी नैरख्ना मेरके निर्वाचन सुरक्षा योजना कार्यान्वयन करे लागल बाटी”, प्रमुख जिल्ला अधिकारी थापा कहलै, “निर्वाचनमे कहीँकतैसे चुनौती आइ नैडेना मेरके सुरक्षाके व्यवस्थापन कैटी रहल बटी ।”

भारतसँगके खुला सीमाके कारण कौनो अवाञ्छित एवं अपराधिक गतिविधि नहोए कहिके सीमा क्षेत्रमे सुरक्षा व्यवस्था मिलाइल बा । भारतके लखिमपुर खिरी जिल्ला ओ नेपालके कैलाली ओ कञ्चनपुरके स्थानीय प्रशान प्रमुखके कैलालीके गोदावरीमे कुछ दिनआघे हुइल सीमा समन्वय बैठकमे निर्वाचनके बेला सीमामे हुइ सेक्ना अवाञ्छित एवं अपराधिक गतिविधि रोक्न सहमति हुइल रहे । बैठकमे मतदानके ४८ घण्टाआघेसे सीमानाकामे आवागमन बन्द कैना सहमतिसमेत डुनु देशके अधिकारीबीच हुइल बा ।

उम्मेदवार, निर्वाचनमे खटुइया कर्मचारीके साथे निर्वाचनस्थल ओ आँजरपाँजरके सुरक्षामे विशेष ध्यान डेहल बा । निर्वाचनमे प्रत्यासीबीचके प्रतिस्पर्धाके क्रममे हुइ सेक्ना अवाञ्छित ओ अमर्यादित गतिविधि हुइ नैडेना फेन विशेषरूपमे ध्यान डेहल बा । यकर लाग आवश्यकताअनुसार सुरक्षा गस्ती बह्राइ लागल बा । निर्वाचन प्रयोजनके लाग जिल्लामे कायम करल कूल २३६ मतदानस्थलमध्ये ५२ मतदानस्थलहे अति संवेदनशील, ५३ मतदानस्थलहे संवेदनशील ओ बाँकी १३१ मतदानस्थलहे सामान्य मतदानस्थलके सूचीमे राखके उहे बमोजिमके सुरक्षा व्यवस्थापन करे लागल बा । इ मतदानस्थलमे ६१९ मतदान केन्द्र कायम करल बा ।

निर्वाचनके सुरक्षाके लाग मतदानस्थलके बाहिरी घेरामे नेपाली सेना, मध्यम घेरामे सशस्त्र प्रहरी बल ओ भित्री घेरामे नेपाल प्रहरीहे परिचालन करे लागल बा । यकर लाग मतदान हुइनासे पहिलेक समय, मतदानके समय ओ मतदानपाछेक समय कैके तीन चरणके सुरक्षा व्यवस्था मिलाइल प्रजिअ थापा बटैलै । निर्वाचनके सुरक्षाके लाग पर्याप्त सुरक्षाकर्मी परिचालन करे लागल बा । यकर लाग जिल्लामे हाल दुई हजार ४०० से ढिउर म्यादी प्रहरीसमेत भर्ना करल बा । निर्वाचन करैना निजामती सेवाके ओ संस्थानके कर्मचारीके खटनपटन कैना काम हुइटी रहल बा । अपुग हुइना अवस्था डेखलमे शिक्षकहे समेत निर्वाचनमे खटाइ लागल बा ।

निर्वाचनके तयारी धमाधम हुइटी रहल बा । प्रदेश निर्वाचन कार्यालय कैलालीके निमित्त प्रमुख प्रेमराज भट्ट निर्वाचनके तयारी तीव्र पारल जानकारी डेलै । “निर्वाचन सम्पन्न कराइक लाग निर्वाचन अधिकृतलगायतहे तालिम डेसेकल बा ।” उहाँ कहलै, “करे पर्र्ना अन्य सक्कु तयारी तीव्ररूपमे हुइटी रहल बा ।”

कैलाली जिल्लामे १३ पालिका बावै । जिल्लाके धनगढी उपमहानगरपालिका सुदूरपश्चिम प्रदेशके एक उपमहानगरपालिका हो । जिल्लामे टीकापुर, लम्कीचुहा, भजनी, गौरीगङ्गा, गोदावरी ओ घोडाघोडी सहित छ नगरपालिका बावै । कैलारी, बर्दगोरिया, चुरे, मोहन्याल, जानकी ओ जोशीपुर कैके छ गाउँपालिका बावै । चुरे ओ मोहन्याल गाउँपालिका पहाडी क्षेत्रमे ओ अन्य पालिका तराई क्षेत्रमे परठ् ।

जिल्लामे पाँच लाख २५ हजार १२५ मतदाता पुगल बावै । इ मध्ये दुई लाख ५६ हजार १०४ पुरुष ओ दुई लाख ६९ हजार १० महिला मतदाता रहल बाटै । आघेक स्थानीय तहके निर्वाचनमे जिल्लामे चार लाख तीन हजार २८० मतदाता रहलमे गैल पाँच बरसमे जिल्लामे एक लाख २१ हजार ८४५ मतदाता थपल बाटै ।