२२ गते एमाले अध्यक्ष ओली सुदूरपश्चिम अइना

पहुरा समाचारदाता
धनगढी, २० वैशाख । नेकपा एमालेका अध्यक्ष केपी शर्मा ओली २२ गते सुदूरपश्चिम अइक लाग बटै ।

स्थानीय तह निर्वाचनके चुनावी आम सभामे एमालेके उम्मेदवार जिटैना उहाँ सुदूरपश्चिम प्रदेश आई लागल हुइट । २२ गते कञ्चनपुर ओ कैलालीके तीन ठाउँमे चुनावी आम सभा हुइना बा । कञ्चनपुरके बेलौरी नगरपालिका ओ कैलालीके धनगढी उपमहानगरपालिकामे चुनावी आम सभा हुइना बा ।

कैलालीके बर्दगोरिया वा लम्कीचुहा मन्से एक ठाउँमे चुनावी आम सभा कैना कहल बा । २२ गते एमाले अध्यक्ष ओली अइना कार्यक्रमके लाग तयारी सुरु हुइल एमाले कैलालीके इन्चार्ज नारदमुनि राना जानकारी डेलैं ।

एमाले कैलाली इन्चार्ज नारदमुनि रानाके अध्यक्षतामे अध्यक्ष ओली अइना कार्यक्रमके लाग मूल परिचालन समिति गठन हुइल बा । तयारीके लाग जनपरिचालन समिति, मञ्च व्यवस्थापन, स्वयम्सेवक व्यवस्थापन, यातायात व्यवस्थापन समिति ओ प्रचारप्रसार तथा मिडिया व्यवस्थापन समिति गठन करल बा ।