नवनिर्वाचित प्रतिनिधिहुकन बधाई तथा शुभकामना कार्यक्रम
पहुरा समाचारदाता
पहलमानपुर, ३ जेठ । कैलालीके घोडाघोडी नगरपालिका–१२ से निर्वाचित प्रतिनिधिहुकनहे बधाई तथा शुभकामना कार्यक्रम कैगिल बा ।
घोराही सामुदायिक वन उपभोक्ता समुह ओ कोटा गाउँवासीहुकनके सयूक्त आयोजनामे नव निर्वाचित प्रतिनिधिहुकनके बधाई तथा शुभकामना कार्यक्रम कैगिल हो । कोटा गाउँक भल्मन्सा शिवकुमार कठरियाके घरगोस्याईमे हुइल बधाई तथा शुभकामना कार्यक्रममे उहाँ भल्मन्सा प्रथाहे कानूनी मन्यता डेहुवाई पर्नामे जोड रहिट ।
कार्यक्रमके वडका पहुना रहल नवनिर्वाचित वडा अध्यक्ष रामदुलारे चौधरी स्थानीयहुकनके सहयोगसे अपने विजयी हुइल ओरसे हार्दिक आभार व्यक्त करले रहिट । उहाँ कहलै, मै अपन कार्यकालमे जनताहुकनके सल्लाह अनुसार काम करम । राष्ट्रिय जनता मावि नकफोडुवाहे उच्च शिक्षा सम पुगैनाके मोर पहल रही ।
घोराही सामुदायिक वनके अध्यक्ष अकाश परियार बधाई तथा शुभकामना डेटी असल नेतृत्व विकासके आधार रहल बटैलै । बुद्धिजिवी सुरत बहादुर कठरिया अब्बेक नेतृत्व कुहीहे विना भेदभाव, पक्ष विपक्ष नइठानके आघे बह्रना सल्लाह डेहल रहिट ।
शिक्षक खुशीराम चौधरी शैक्षिक गुणस्तरहे ध्यान डेहे पर्नामे जोड डेहल रहिट । नवनिर्वाचित प्रतिनिधिहुकनहे साहित्यकार शिलाश चौधरी लगायत बधाई तथा शुभकामना डेहल रहिट ।
कार्यक्रमके संचालन उ सामुदायिक वनके सचिव बन्दना चौधरी करले रहिट । घोडाघोडी नगरपालिका वडा नम्बर १२ मे नेपाली काँग्रेससे रामदुलारे चौधरी नेतृत्वके पुरे प्यानल विजयी हुइल रहे । उहाँ ८२६ मत नानके विजयी हुइल रहिट । हुकान प्रतिद्धन्दी एमालेके खडकबहादुर चौधरी (उमार) ३५१ मत पैलै ।
वडा सदस्यमे नेपाली काँग्रेसके धु्रव गौतम १०९३, अमन चौधरी १०३९, महिला सदस्य सुमिता चौधरी ८४३ ओ दलित महिला सदस्य मातादेवी दमाई ८२२ मत नानके पुरे प्यानल विजयी हुइल रहिट ।
