कैलारीके नवनिर्वाचित अध्यक्ष चौधरीसे सपथ
पहुरा समाचारदाता
धनगढी, ५ जेठ । कैलालीके कैलारी गाउँपालिकाके नवनिर्वाचित अध्यक्ष राजसमझ चौधरी सपथ ग्रहण करले बाटै । बिफेक रोज जिल्ला न्यायाधिस जयानन्द पनेरु चौधरीहे सपथग्रहण कराइल हुइट ।
नवनिर्वाचित अध्यक्ष चौधरी गाउँपालिका अध्यक्ष पदमे भारी मतसे विजयी हुइल बाटै । उहाँ १० हजार ४९२ मत प्राप्त करके विजयी हुइलै कलेसे नेकपा माओवादी केन्द्रके लाजुराम चौधरी ६ हजार ४३० मत प्राप्त करलै । निवर्तमान गाउँपालिका समेट रहल उहाँहे ४ हजार ६२ मतसे पराजित हुइल बटै ।
ओस्टके गाउँपालिका उपाध्यक्ष पदमेफे नेपाली काँग्रेसके भगवतीकुमारी चौधरी अपन प्रतिद्वन्दीहे भारी मतसे हरैले बटी । उहाँ १० हजार ४ सय ८४ मत पाके विजयी हुइल बटी कलेसे हुकान निकटम प्रतिस्पर्धी माओवादी केन्द्रके लक्ष्मी सत्गौवाथारु ६ हजार ४७७ मत पैली । उहाँ ४ हजार ७ मतसे पराजित हुइल बटी ।
कैलारी गाउँपालिकाके वडा नम्बर १ से ९ वडा काँग्रेसके पुरे प्यानल बहुमतसे विजयी हुइल बा कलेसे अप्खी चुनावमे कैलारी गाउँपालिकामे माओवादी केन्द्र क्लीन स्वीप हुइल बा ।
वडा नम्बर १ मे धोजहरिपाल बोहरा, वडा नम्बर २ मे विकास चौधरी, वडा नम्बर ३ मे सन्तराम चौधरी, वडा नम्बर ४ मे ठागुराम चौधरी, वडा नम्बर ५ मे विष्णु प्रसाद चौधरी, वडा नम्बर ६ मे प्रेमबहादुर चौधरी, वडा नम्बर ७ मे दिपेन्द्रबहादुर बम, वडा नम्बर ८ मे तारामल कठरिया ओ वडा नम्बर ९ मे खेमराम चौधरीसहिट उहाँहुकनके पुरा प्यानल वडा सदस्य, महिला सदस्य, खुला सदस्य, दलित महिला सदस्य विजयी हुइल बटै ।
