अछामके पञ्चदेवल नगरपालिकाके मेयरमे चलाउने
धनगढी, ६ जेठ । इ बेरके निर्वाचनमे सुदूरपश्चिममे पहिल महिला मेयर छानल बाटी अम्बिका चलाउने । अछामके पञ्चदेवल विनायक नगरपालिकाके मेयरमे निर्वाचित नेपाली काँग्रेसके चलाउने प्रदेशके पहिल महिला मेयर हुइल हुइटी ।
उहाँ तीन हजार ६५३ मत प्राप्त करले बाटी । ओहकान प्रतिद्धन्द्वी माओवादीके रामबहादुर विक तीन हजार १७२ मत प्राप्त करले बाटै । एमालेसे मेयरके उम्मेदवार नन्दबहादुर कडायत दुई हजार ६९७, एकीकृत समाजवादीके योगेन्द्रबहादुर विष्ट ६९२ ओ स्वतन्त्र उम्मेदवार टंक तिमिल्सैना १५४ मत प्राप्त करलै ।
निवर्तमान नगर उपप्रमुख समेत रहल चलाउने काँग्रेस सुदूरपश्चिम प्रदेशके सहमहामन्त्री समेत हुइटी ।
आघेक चुनावमे डोटीके दिपायल सिलगढी नगरपालिकासे एमालेके मञ्जु मलासी मेयर जितल रही । इ बेर लम्कीचुँहामे फेन काँग्रेसके शुसिला शाही मेयर निर्वाचित हुइना सम्भावना बह्रल बा ।
मेयरमे उठल अमरगढीमे संगिता भण्डारी, बेलौरीमे कमल बोहरा, बेदकोट नगरपालिकामे शुसिला सिंह भर पराजीत होेसेकल बाटै ।
ओस्टके पञ्चदेवल विनायक नगरपालिकाके नगर उपप्रमुखमे फेन काँग्रेसके हर्कबहादुर रावल विजयी हुइल बाटै । उहाँ चार हजार १८८ ओ निकटतम प्रतिद्वन्द्वी माओवादीके रीता रावल दुई ६१८ मत पैली । ओस्टके एमालेके राजु सञ्ज्याल एक हजार दुई ओ समाजवादीके कृष्णा जैसी न्यौपाने ७ मत पैले बाटी ।
