आगलागी प्रभावितहे नगदसहित खाद्यान्न सहयोग
पहुरा समाचारदाता
धनगढी, १५ जेठ । बिचल्लीमे परल कैलालीके कैलारी गाउँपालिका–७, विपतपुरके अग्नी पीडित मुक्तकमैयाहे नगदसहित खाद्यान्न सहयोग करल बा ।
अँट्वारके रोज धनगढी उपमहानगरपालिका अन्तर्गतके नगरस्तरीय भलमन्सा समितिसे नगद ४७ हजार ६४५ ओ ६० क्वीन्टल खाद्यान्न सहयोग करल हो । वडा नम्बर ७ के वडाध्यक्ष दीपेन्द्र बम ओ समितिके सचिव रोहित चौधरी विपतपुर गाउँक सचिव अर्जुन चौधरीहे उ सहयोग हस्तान्तरण करगिल हो ।
सहयोग हस्तान्तरण कार्यक्रममे वडा नम्बर ७ के वडाध्यक्ष दीपेन्द्र बम विपतमे परल घरपरिवारहे धनगढी नगरस्तरीय भल्मन्सानके टोलीसे करल सहयोग सह्रानीय रहल बटैलै ।
उहाँ अग्नी पीडित परिवारहुक्रनके बासके समस्या हुइल ओरसे घर निर्माणके लाग कठुवा लगायत अन्य चीजके लाग बसन्ता सिएफसीसी, गाउँपालिकाा अन्तर्गतके समुदायिक वन उपभोक्ता समितिसे समन्वय हुइटी रहल बटैलै । बस्तीमे खानेपानीके फेन ढिउर समस्या रहल ओरसे खानेपानीके लाग फेन पहल करल बटाइल रहिट ।
धनपा ११ बाँसखेराके भलमन्सा गीता चौधरीसे गाउँ समाजसे उठाके नगद ६ हजार ७०५ रुपियाँ, धनपा ५ तारानगरके भलमन्सा गोठुरामसे ३ हजार २२५ रुप्या, वडा नम्बर ६ मटियारीके भलमन्सा विन्तीराम चौधरी मार्फत ५ हजार ७०५ रुप्या ओ धान, गहुँ लगायत जिन्सी सामान, वडा नम्बर ९ बंगरा कटानके भलमन्सा रामनारायण चौधरीसे ३ हजार सहयोग रकम हुइल बा ।
ओस्टके धनपा १३ श्रृलंका सुकुम्बासी टोलसे भलमन्सा आइतराम चौधरीसे ८ हजार ८८० रुप्या श्रृलंका मुक्त कमैया टोले भलमन्सा सञ्चु चौधरीसे ५ हजार ८१५ रुप्या, राजपुरके भलमन्सा भोजराम रानासे ३ हजार ८३० रुप्या, मोहनपुरसे भलमन्सा जगतराम चौधरीले ७१५५ रुप्या, झलारी गाउँके रंगीराना भलन्सासे १ हजार ५० रुप्या, धनपा १८ के २६ नम्बर टोले भलभन्सा जागुराम चौधरीसे १४५ रुप्या नगदसहित जिन्सी सामान, धनपा १८ नुक्लीपुरसे भलमन्सा कृष्ण चौधरी मार्फत नगद १४० सहित जिन्सी सामान, बिस मिटर टोेलसे भलनम्सा अनिल चौधरी मार्फत जिन्सी सामान, बर्का टोल इ गाउँ मार्फत नगद ५०५ रुप्या ओ जिन्सी सामान, छोट्की इ टोले भलमन्सा ठाकुरप्रसाद चौधरी मार्फत नगद १५० सहित जिन्सी सामान, तुल्सीबारी टोले भलमन्सा महंगु चौधरी मार्फत जिन्सी समान सहयोग हुइल जनाइल बा ।
घर, सम्पत्ति, खाद्यान्न, लत्ता कपडा सक्कु जरल पीडित मुक्तकमैया परिवारहुक्रनके लाग भलमन्सा मार्फत अपनअपन गाउँ समाजमे उ सहयोग संकलन करल हो ।
ओस्टके, घोडाघोडी नगरपालिका वडा नम्बर ११ सिसैयाके पशुपति सामुदायिक वन अग्लापुरसे चाउर, गेहुँ, धान लगायत ५ क्वीन्टल बराबरके सहयोग हुइल बा ।
खेट्वामे गोहुक लर्वा जराइक लाग लगाइल आगी बैशाख ११ गते विपतपुरके मुक्त कमैयाके घरमे लागल रहे । ७१ घरधुरी रहल बस्तीमे ३४ घर पूर्ण रुपमे जरके भुवा बनल बा कलेसे २७ घरमे आङ्शिक क्षति हुइल कैलारी गाउँपालिकाके कार्यालय जनैले बा ।
ओस्टके, दुईठो पावर टिलर, आठठो डल्लप, १३ ठो डिजल इञ्जिन, ४५ ठो सोलार, एकठो मोटर पम्प, टमान घरमे ढारल नगद १२ लाख रुपियाँ जरके नष्ट हुइल बा । ओस्टके, थारु समुदायके महिलाहुक्रे लगैना पुर्खौली गहना जरके नष्ट होके सुन १२ तोला ओ अत्यधिक चाँदी जरल बा । आगलागीसे १२ ठो बरवार सुवर ओ २५ ठो घेँटरु, दुईठो गोरु मरल जनाइल बा । घरबारविहीन बनल पीडितहे रेडक्रससे ७५ ठो टेन्ट उपलब्ध कराइल ओ अन्य संघसंस्थासे फेन सहयोग जुटल बा ।
