तारा एयरके विमान दुर्घटनाग्रस्त अवस्थामे मिलल
पोखरा, १६ जेठ । पोखरासे मुस्ताङके लाग अँट्वार बिहान उरलके सम्पर्कबिहिन हुइल तारा एयरके ट्वीनअटर ९एन एइटी विमान दुर्घटनाग्रस्त अवस्थामे फेला परल बा ।
मुस्ताङके मानापाथी हिमालके फेदी स्थित थासाङ गाउँपालिका–२, न्याउरिकोटके ल्याङके खोलाके मुहानमे छरपस्ट अवस्थामे विमानके पाटपुर्जा किलल मध्यकमाण्ड हेडक्वाटर पोखराके कमाण्डपति उपरथी बाबुराम श्रेष्ठ जानकारी डेलैं ।
उद्धारमे खटल नेपाली सेनाके टोली विमान फेलापारल जानकारी डेहल हो । यहोर तत्काल उ क्षेत्रमे सेनाके हेलिकप्टर गैल ओ मौसम साथ डेलेसे यात्रुहुकनके मृतशरीर पोखरा नन्ना तयारी हुइल सेना जनैले बा ।
अँट्वारके बिहान ९ः५५ बजे जहाज जोमसोम विमानस्थल अवतरणके लाग उरलेसे फेन नैपुग्के सम्पर्क बिहिन हुइल रहे । विकट ओ उच्चक्षेत्रमे विमान दुर्घटनामे परल ओ भारी आवाज आइल स्थानीयबासीहुक्रे जानकारी कराइलबाद उ क्षेत्रमे अँट्वारसे खोजी कार्यतिव्र बनाइल रहे । विमानमे दुई जर्मनी नागरिक, चार भारतीय नागरिक, १३ नेपाली नागरिक ओ तीन चालकदल सहित २२ जाने रहैं ।
जहाज दुर्घटनामे धनगढीके २ के मृत्यु
ओस्टेक, तारा एयरके जहाज दुर्घटनामे परके ज्यान गुमाइलमे धनगढीके २ जाने रहल पुष्टि हुइल बा । कैलालीके धनगढी उपमहानगरपालिका–१४, एचगाँउ फूलवारीके पुरुषोत्तम गोले ओ ईन्द्रदेवी तामाङ रहल बटैं । उहाँहुक्रे गोसिया गोसिनिया हुइट् ।
