विमान दुर्घटनमे ज्यान गुमुइया धनगढीके दुई जाने
पहुरा समाचारदाता
धनगढी, १६ जेठ । तारा एयरके विमान दुर्घटनामे परके ज्यान गुमुइयामे धनगढीके दुई जाने रहल पुष्टी हुइल बा ।
धनगढी उपमहानगरपालिका १४ एच गाँउ फुलवारीके पुरुषोत्तम गोले ओ तुलसीदेवी तामाङ्ग रहल बाटै । उहाँ डुनु जाने गोसिया गोसिनीया हुइट ।
गलैचा उद्योगके संचालन कैके काठमाण्डौ बैठ्टी आइल पुरुषोत्तम गोले धनगढी उपमहानगरपालिका १४ एच गाँउ फुलवारीमे शिद्वार्थ आधारभुत विद्यालय स्थापना करल रहिट । सामाजिक अगुवाके रुपमा पहिचान बनाइल गोले विद्यालय स्थापनाके बेला निःशुल्क रुपमे शिक्षण करल रहिट । ‘फुलवारी एच गाँउमे शिक्षाके विकासमे उहाँके ढिउर योगदान रहल बा’ विद्यालयके प्रधानाध्यापक तेजबहादुर पाख्रीन कहलै–‘मै फेन उहाँके शिष्य हुइटुँ ।’
शाही शासनमे तत्कालिन फूलवारी गाविसके युवा संयोजक होके पुरुषोत्तम गोल राजनीतिमे सक्रिय रहल रहिट । उहाँ अपने राजनीतिमे सक्रिय रहल बेला फूलवारीमे टमान सामाजिक कार्यमे सक्रिय रहल स्थानीय मेहेश गोले तामाङ्ग बटैलै ।
बहुदल अइलेसे फेन उहाँ राजनीतिमे सक्रिय रहल महेश बटैलै । अब्बे पुरुषोत्तम गोलेके निधनसे तमाङ्ग बस्ती रहल फूलवारीके एच गाँउ पुरै शोकमे डुबल बावै ।
राजा बिरेन्द्रके कार्यकालमे २०३६ सालमे दुई बिगहापाँच कठ्ठा जमिन डेके धनुषासे धनगढी स्थान्तरण कराइल रहे । उहाँक सँगे ९७ घर धुरी बसाई सराई होके आइल रहिट । उहाँ काठमाण्डौमे जोरपाटी गलैचा उद्योग संचालन कैटी आइल रहिट ।
ओहकान तिन छावा ओ तिन छाइ बाटिन् । मुक्तीनाथ दर्शन करे गैल बेला गोसिया गोसिनीयाके विमान दुर्घटनामे ज्यान गुमाइल हुइट ।
