नगरवासीहे धनगढी मेयरके आग्रहः काममे ढिलासुस्ती हुइलेसे फोन करहो

पहुरा समाचारदाता
धनगढी, १६ जेठ । कैलालीके धनगढी उपमहानगरपालिकाके मेयर गोपाल हमाल सूचना डेनामे कौनो कञ्जुस्याई नैकैना बटैले बटैं । उहाँ उपमहानगरमे कौनो मेरके अनियमितता हुइलमे नगरवासीहे उजुरी कैना समेत आग्रह करले बटैं ।

‘कार्यपालिका संविधानसे उप्पर नैहो । सूचना डेना हमार दायित्व हो । हमार प्रयास का रही कलेसे नागरिक सूचना मागे पर्ना नैहो हम्रे डेहे पर्र्ना संस्कारके थालनी करे चाहटी । सूचनाके लाग नगरपालिका आइ नपरे’, धनगढीमे हुइल पत्रकार सम्मेलनमे उहाँ कहलै ।

उपमहानगरके कौनो गुनासो रलेसे एकठो नम्बरसमेत उपलब्ध कराइल उहाँ बटैलै । ‘धनगढी उपमहानगरपालिकाके कौनो फेन काम गुणस्तरहीन हुइल, ढिलासुस्ती हुइल, घुस मग्लै अथवा नियम विपरीत कौनो फेन कार्य हुइटी रहल बा कलेसे सिढे ९८५८४८८८९५ ह्वाट्सएप नम्बरमे सम्पर्क करबी’, हमाल कहलै ।

कर्मचारीहुक्रनके कार्यशैलीमे फेन सुधार कैना अपने प्रयासरत रहल उहाँ बटैैलै । ‘धनगढीमे कर्मचारीनके कारण बिग्रल कना जनमानसमे जौन मेरके छाप बा । उ बातहे सुधार कैना अब्बे मौका आइल कटी बाटुँ । नियमभिट्टर रहीके काम करडेहो कना अनुरोध करले बटु ।’ काल्हके दिनमे का हुइलसे फेन आब का कैना कना बात महत्वपूर्ण रहल उहाँ बटैलै ।

पञ्चवर्षीय आवधिक योजना बनाइक लाग विज्ञहुक्रनके सल्लाह अनुसार आघे बह्रना उहाँ बटैलै । भ्रष्टाचार अन्त्य कैके सुशासन कायम ओ लोककल्याणकरी नगरके निर्माणमे अपने लागल बटैटी उहाँ व्यक्तिगत कामके लाग भर उ नम्बरमे फोन नैकैडेना समेत अनुरोध करलै । उपमहानगरपालिकाके सूचना अधिकारी सुरेन्द्रसिंह कार्की कतिपय सूचना डेहे मिल्ना ओ नैमिल्ना रहल ओरसे सूचना वर्गीकरण कैके तत्काल सूचना उपलब्ध करैना प्रतिबद्धता जनैलै ।