अत्तरिया हस्पिटल सञ्चालन
पहुरा समाचारदाता
धनगढी, १६ जेठ । कैलालीके अत्तरियामे अत्याधुनिक सुविधा सम्पन्न अत्तरिया हस्पिटल सञ्चालनमे आइल बा । अत्तरिया चोक लग्गे महेन्द्रनगर रोडमे १५ करोडके लगानीमे अत्याधुनिक सुविधा सम्पन्न अत्तरिया हस्पिटल सञ्चालनमे आइल हो ।
सोम्मारके हस्पिटलमे आयोजना करल पत्रकार सम्मेलनमे अत्तरिया हस्पिटलके प्रमुख डा. आनन्द पाठक सुदूरपश्चिमके ७ पहाडी जिल्ला ओ तराई २ जिल्लाके नागरिकहे केन्द्रित कैके प्रदेशमे गुणस्तरीय सेवा डेना उद्देश्यके साथ २४ घण्टा सेवासहित अत्तरियामे अत्तरिया हस्पिटल सेवा सुचारु करल जानकारी डेलै ।
अस्पतालमे ई सिजी मेशिन, डिजिटल एक्स–रे, अत्याधुनिक ल्याब, भेन्टिलेटर, आइसियु, एनआईसियु, आकस्मिक उपचार कक्ष, हाडजोर्नी तथा स्पाइनल शल्यक्रिया, शल्यक्रियासहितके प्रसूति सेवा, सिटी स्क्यान, दूरबिनसे पत्थरी, एपेन्डीक्स, हर्निया हाइड्रोशील लगायतके सम्पूर्ण शल्यक्रिया, लगायतके सेवा ओ अपने फार्मेसीसहितके सेवा रहल अस्पताल जनैले बा ।
हस्पिटलमे १० जाने अनुभवी विशेषज्ञ चिकित्सकसे सेवा डेना जनाइल बा । हाल हस्पिटल १५ बेडके स्वीकृति लेहल ओ १०० बेड समके भौतिक संरचना बनाइल हस्पिटलके प्रमुख डा. पाठक बटैलै ।
कुछ समयपाछे थप सेवा बिस्तार कैना फेन बटैलै । बिरामी अन्यत्र जाइ पर्र्ना समस्याहे मध्यनजर कैके हस्पिटलसे सक्कु मेरके स्वास्थ्य सेवा डेना मेरके हस्पिटल सेवा बिस्तार कैना लक्ष्य रहल हस्पिटलके प्रमुख डा. पाठक बटैलै ।
