भजनी नगर कार्यपालिकामे नागरिक उन्मुक्ति ओ एमालेके गठबन्धन विजयी

पहुरा समाचारदाता
धनगढी, १७ जेठ । कैलालीके भजनी नगर कार्यपालिकामे ८ जाने सदस्य निर्वाचित हुइल बाटै । कार्यपालिका सदस्यके लाग नागरिक उन्मुक्ति पार्टी ओ नेकपा एमालेबीच तालमेल हुइल रहे । ८ जनहनके लाग हुइल निर्वाचनमे १३ जनहनके उम्मेदवारी परल रहे । उ मध्ये नागरिक उन्मुक्तिके ६ जाने ओ एमालेके २ जाने निर्वाचित हुइल बाटै ।

निर्वाचित हुउइयामे महिला सदस्य ओर नागरिक उन्मुक्तिके कृष्णकुमारी चौधरी, जैसरा कामी ओड, मनदेवी चौधरी, शान्तिकुमारी चौधरी ओ रजमती चौधरी रहल बाटै । उहाँहुक्रे कुल गिरल ४६ मध्ये ३३ मत पाइल बाटै ।

ओस्टके दलित वा अल्पसंख्यक ओर नागरिक उन्मुक्तिके एकजाने ओ एमालेके दुईजाने निर्वाचित हुइल बाटै । नागरिक उन्मुक्तिके गणेशकुमार विक, एमालेके प्रेमबहादुर चन्दरा ओ रामदेवी राजी निर्वाचित हुइल बाटै । विक ३२ मत पैलै कलेसे प्रेम ओ रामदेवी ३३/३३ मत पैले बाटै ।

कांग्रेसके प्रतावसिंह ताम्राकार, सन्तोष दमाई १३/१३ मत पैले रहिट । भजनीमे नागरिक उन्मुक्तिके २३ ओ एमालेके १० जाने सदस्य रहल बाटै । माओवादी ओ कांग्रेस तालमेल कैके निर्वाचनमे होमल रहिट । महिला सदस्य ओर रामकुमारी देवी चौधरी, रिनाकुमारी डगौँरा, रेखा कामी १३ मत पैलै ।