५१ प्रतिशत किशोरीउप्पर यौन हिंसा
विद्यालयमे सुरक्षित नैहुइल बालिका ओ किशोरी
पहुरा समाचारदाता
धनगढी, १७ जेठ । महिला पुनस्र्थापना केन्द्र (ओरेक)के से सार्वजनिक करल तथ्याङक अनुसार एक महिनामे ५१ प्रतिशत किशोरीउप्पर यौन हिंसा हुइल पाइल बा ।
ओरेकसे चैत्र २०७८—वैशाख २०७९ सम कार्यालयमे अभिलेखिकरण हुइल तथा टमान राष्ट्रिय पत्रपत्रिकासे प्राप्त (३७ ठो) तथ्याङक करके ३९० ठो लैङिक विभेदमे आधारित हिंसाके तथ्याङक संकलन करेबेर ओम्नेसे सबसे ढेर ५१ प्रतिशत किशोरीउप्पर यौनजन्य हिंसा हुइल पाइल हो । जेम्ने ३० प्रतिशत (२३ जाने) किशोरीके बलात्कार, ७ प्रतिशत (६ जानेक) के बलात्कारके प्रयास ओ १४ प्रतिशत किशोरी (१२ जाने) उप्पर यौन दुव्र्यवहार हुइल बा ।
पछिल्का कुछ समययहोर देशमे महिला तथा किशोरीउप्पर हिंसाके घटना सार्वजनिक हुइना क्रम बह्रल ओरेकके कार्यकारी निर्देशक लुभराज न्यौपाने बटैलै । अपनेहुकनहे हुइल हिंसा बारे खुलके कहेबेर अपने चरित्र उप्पर लाञ्छना भोगे पर्ना सामाजिक परिपाटिसे अभिन ढेर घटना बाहेर आई नइसेकल उहाँ बटैलै । एक महिनाके तथ्याङक हेरेबेर विद्यालयमे बालिका ओ किशोरी असुरक्षित रहल निर्देशक बटैलै ।
सुदूरपश्चिम प्रदेशके दार्चुला जिल्ला नौगड गाँउपालिकाके एक विद्यालयके शिक्षक छात्राहे बलात्कार ओ यौनदुव्र्यवहार करल आरोपमे पक्राउ परल बटै । आरोपित शिक्षक विद्यालयमे अध्ययनरत १७ बर्षिया किशोरीहे गैल फागुनमे बलात्कार करके भिडियो बनाइल प्रहरी जनैले बा । उहे भिडियोसे ब्ल्याकमेल करटी शिक्षकसे किशोरीहे निरन्तर बलात्कार करल युवती बटैले बटी । उ भिडियो उ शिक्षकसे दुसर शिक्षकहे फेसबुक मेसेन्जरमे सेयर करलपाछे उहाँ दुसरहे शेयर करले रहिट ।
उ भिडियोहे भारतके बैंगलोरसे एकजाने फेसबुकमे सार्वजनिक करलपाछे प्रभावित किशोरी शिक्षकके विरुद्ध बलात्कार, हाडनाता करणी ओ साइबर अपराधके मुद्धा दरले बटी । शिक्षक प्रभावित किशोरीके नातामे डाडु परठै । यी घटना प्रतिनिधिमुलक केल हो ।
ओस्टेक करके सुन्दरी प्रतियोगितामे ८ वर्ष आघे सहभागी हुइल एक किशोरीहे अपनहे सञ्चालकसे बेहोस बनाके बलात्कार करल तथ्य सामाजिक सञ्जालमे सार्वजनिक करल रहिट ।
नवलपरासीके गैँडाकोट नगरपालिकाके एक शिक्षक १२ कक्षामे अध्ययनरत छात्राहे अश्लिल भिडियो डेखाके यौनदुव्र्यवहार करल आरोप लागल बा ।
ओस्टेक नाबालिक छात्राहे यौनदुव्र्यवहार करल आरोपमे गुल्मीमे प्रहरी दुइजाने शिक्षकहे पक्राउ करले बा ।
सुनसरी जिल्लाके इटहरी स्थित एक विद्यालयके प्रिन्सिपल २०७२/७३ मे दुइ वर्ष लगातार बलात्कार करल कहिके एक किशोरी घटना सार्वजनिक करले बटी ।
काठमाण्डौके चावहिलस्थित सेन्ट लरेन्स कलेजके छात्राहुक्रे विद्यालयके कोअर्डिनेटर ओ शिक्षकसे छात्राहुकनहे यौनदुव्र्यवहार करल कहटी आन्दोलन करलपाछे प्रहरी आरोपित दुनहुनहे पक्राउ करले बा ।
बालिका तथा किशोरी उप्पर हुइना हिंसामन्से २२ प्रतिशत १९ वर्षसे कम उमेरके बालिका तथा किशोरी उप्पर हुइल पाइल ओरेक नेपाल जनैले बा ।
