प्रतिलिटर १० रुपैयाँ घटल पेट्रोल–डिजेलके मूल्य
काठमाडौं, १९ जेठ । नेपाल आयल निगम डिजेल, पेट्रोल ओ मटितेलके मूल्य घटैले बा । बिफेक रोज बैठल निगम सञ्चालक समितिके बैठकसे डिजेल, पेट्रोल ओ मट्टितेलके मूल्य लिटरमे १०–१० रुपैयाँ घटैना निर्णय करल निगमके प्रवक्ता विनितमणि उपाध्याय जानकारी डेलैं ।
आब पेट्रोलके मूल्य प्रतिलिटर १७० रूपैयाँ ओ डिजेल तथा मटितेलके मूल्य १५३ रूपैयाँ परि ।
अर्थ मन्त्रालय पुर्वाधार कर घटाके मूल्य समायोजन करना लिखित निर्देशन डेहलओरसे ओहे निर्णय हुइल प्रवक्ता उपाध्यय बटैलैं ।
सरकार पेट्रोलियम पदार्थमे लग्ना प्रतिलिटर १० रूपैयाँ पूर्वाधार कर घटाइलओरसे मूल्य समायोजन हुइल हो । बजेट वक्तव्यमार्फत सरकार पेट्रोलमे लगाइल कर घटैना घोषणा करले रहे ।
अन्तर्राष्ट्रिय बजारमे पेट्रोलके मूल्य बह्रके उच्च दरके करके कारण मूल्य फेन बह्रल रहे । डा. युवराज खतिवडा अर्थमन्त्री रहल बेला प्रतिलिटर इन्धनमे पूर्वाधार कर समेत जोरके लेना सुरु हुइल रहे । उहिनहे हटैना माग हुइटि आइलेसे फेन सरकार बेवास्ता करटि आइल रहे ।
खाना पकैना ग्याँस ओ हवाई इन्धनके मूल्य भरे घटल नैहो ।
