भाटभटेनीसे धनगढी उपमहानगरमे पाँच वर्ष निःशुल्क स्वास्थ्य परिक्षणके घोषणा
पहुरा समाचारदाता
धनगढी, २५ जेठ । यिहे जेठ २७ गते धनगढीमे शाखा उद्घाटन हुइ जैटिरहल भाटभटेनी सुपरमार्केट धनगढी उपमहानगरपालिकामे ५ वर्षसम निःशुल्क स्वास्थ्य परिक्षण करना घोषणा करले बा ।
अगामी ५ वर्षके लाग उपमहानगरपालिकाके १ से १९ वडामे प्रत्येक महिनाके १ दिन वडाके स्वास्थ्य संस्थामे विशेषज्ञ डाक्टरसहितके टोलीसे निःशुल्क स्वास्थ्य परिक्षण कैना उपमहानगरपालिकासे बुधके रोज सम्झौता करले बा ।
उ शिविरमे एकठो स्त्रीरोग विशेषज्ञ ओ एकठो फिजिसियन डाक्टरसे निःशुल्क स्वास्थ्य परिक्षण हुइना सम्झौता हुइल बा । उ सम्झौतामे डाक्टरके सेवासुविधा भाटभटेनीसे डेना जनागिल बा । निःशुल्क स्वास्थ्य परिक्षण शिविर यिहे सावनसे सुरु हुइना बा ।
दुईतर्फि हुइल ५ वर्षे सम्झौतापत्रमे धनगढी उपमहानगरपालिकाके ओरसे नगरप्रमुख गोपाल हमाल ओ भाटभटेनी सुपरमार्केटके प्रबन्ध निर्देशक÷अध्यक्ष मीनबहादुर गुरुङ हस्ताक्षर करटि एकडुसरहे सम्झौतापत्र साटासाट करले रहे ।
सुपरमार्केटके निर्देशक/अध्यक्ष गुरुङ सुदूरपश्चिममे स्वास्थ्य सेवा डेहे पाइलमे अप्ने खुसी हुइल बटैलैं । उहाँ अपन नाउसे खोलल छात्रबृत्तिमे सुदूरपश्चिम प्रदेशके दुई जाने स्वास्थ्य शिक्षा अध्ययन करना अवसर पाइल बटैलैं । गुरुङ कहलैं, “भाटभटेनी दुर्गम जिल्लामे फेन निःशुल्क स्वास्थ्य परिक्षण शिविर सञ्चालन करटि आइल बा । यहाँ फेन स्वास्थ्य शिविर सञ्चालन करे पैना हमार लाग खुसीके बाट हो ।”
ओस्टेक, नगरप्रमुख गोपाल हमाल निःशुल्क स्वास्थ्य परिक्षणसे धनगढी उपमहानगरपालिकामे रहल जेष्ठ नागरिक, महिला तथा बालबालिकाहुक्रे स्वास्थ्य सेवाके अवसर पैना बटैलैं । उहाँ कलैं, “मै चुनावी डौरानके बेला उपमहानगरपालिकाके गाउँठाउँमे जाइबेर ढेर जैसिन स्वास्थ्य समस्यासे ग्रसित जेष्ठ नागरिक, महिला तथा बालबालिका भेटैनु । ओहेबेला अपन मनमे निःशुल्क स्वास्थ्य शिविर सञ्चालन कैना सोच आइल रहे, भाटभटेनी हम्रिहिनसे सहकार्य करटि, हमार सोचल एक काम पूरा हुइल ।” चुनावी घोषणापत्रमे हम्रे कलेरहि– उपमहानगरपालिकाहे हम्रे धनगढी मोडेल बनाब । हमार अभियानमे भाटभटेनीसे एक खुड्किला आघे बह्रना सहयोग करले बा ।
