डिलाशैनी गाउँपालिकामे एक मतदाता एक रुख्वा लगैना कार्यक्रम सञ्चालन

बैतडी, २८ जेठ । बैतडीके डिलाशैनी गाउँपालिकासे एक मतदाता एक रुख्वा लगैना कार्यक्रम सञ्चालन करल बा । पालिकाभर रहल मतदाता संख्या बराबर वृक्षारोपण करजैना डिलाशैनी गाउँपालिकाके प्रवक्ता यज्ञराज भट्ट बटैलै ।

डिलाशैनी गाउँपालिकामे १३ हजार २५२ मतदाता रहल ओ उहे संख्यामे वृक्षारोपण कैना योजना रहल बा । कार्यक्रमके लाग गाउँपालिकासे सूचना प्रकाशित कैटी मतदाता संख्या बराबर वृक्षारोपण कार्यक्रममे सहभागी हुइक लाग आवेदन डेना आग्रह समेत करल बा । फलफूलके बिरुवाके लाग अगामी असार २ गतेसम सम्बन्धित वडा कार्यालयमे निवेदन पेश कैना आग्रह करल बा ।

अब्बेक लाग फलफूलअन्तर्गत कागतीके विरुवा वितरण कैना योजना रहल जनाइल बा । कार्यक्रममे सहभागी हुइ चहुइया कृषि समूह, कृषि सहकारी, कृषि फर्म ओ कृषि उद्यमीहे आग्रह करल बा । मतदाता संख्या बराबर वृक्षारोपण कार्यक्रममे सहभागी हुउइया कम्तीमे ५० बिरुवा रोपणके लाग ठाला तयार करल हुइ पर्र्ना गाउँपालिकाके सूचनामे उल्लेख करल बा ।

ओस्टके कृषि सहकारी, समूह ओ फर्म दर्ता ओ नवीकरण हुइल प्रमाणपत्र, कार्यक्रम सञ्चालन हुइना जग्गाके स्वामित्व खुल्ना प्रमाणपत्र, निवेदकके नागरिकता ओ कृषि समूहके हकमे समूहके निर्णयके प्रतिलिपि आवश्यक रहल सूचनामे उल्लेख करल बा ।

कृषिमार्फत उद्यमशीलतासँग जोरक लाग इ कार्यक्रम सञ्चालन करल डिलाशैनी गाउँपालिकाके अध्यक्ष सन्तोषप्रकाश जोशी बटैलै । वातावरण संरक्षण करे सेक्लेसे किल मानव जातिहे सहज हुइना हुइल ओरसे इ कार्यक्रमहे निरन्तर आघे बह्रैना जोशीके कहाइ रहल बा । इहीसे आघे विश्व वातावरण दिवसमे गाउँपालिका अध्यक्ष जोशी मतदाता संख्या बराबर वृक्षारोपण कार्यक्रम सञ्चालन कैना घोषणा करल रहिट ।