निर्माण सम्पन्न योजनाके अनुगमन
पहुरा समाचारदाता
धनगढी, १ असार । कैलारी गाउँपालिका स्तरीय अनुगमन समितिसे गाउँपालिकामे निर्माण सम्पन्न हुइल योजनके अनुगमन करल बा ।
गाउँपालिका उपाध्यक्ष तथा अनुगमन समिति संयोजक भगवतीकुमारी चौधरीके संयोजकत्वमे मंगरके रोज निर्माण सम्पन्न हुइल योजनाके अनुगमन करल हो । वडा–९ सामारचौरामे सम्पन्न कोइलाही सामुदायिक भवनके अनुगमन करल बा । यी भवन निर्माणके लाग सुरुके बर्ष ४ लाख, गैल बरस ५ लाख ओ यी बरस ६ लाख ८० हजार रुप्या विनियोजन करल रहे ।
वडा नम्बर ७ बसन्तामे रहल बसन्ता डिभिजन वन कार्यालयमे उत्पादन हुइल वन नर्सरीके अनुगमन करल बा । गाउँपालिकाके ५ लाख ओ डिभिजन वन कार्यालयके ५ लाख करके १० लाखमे १ लाख टमान जातके टेलुवा उत्पादन करल बा । यहाँ सिसुवा, सगुन, लिप्टीस, बाकाइनो जातके टेलुवा तयार हुइल बा ।
अनुगमन समितिसे वडा नम्बर ५ मे कटैनी लडियक किनारमे भुटहा कोनुवा सम डयाम निर्माण ओ मर्मत कैगिल बा । प्रधानमन्त्री स्वरोजगार कार्यक्रम अन्र्तगत ४ सय १० मिटर डयाम निर्माण योजना शाखा प्रमुख सन्तोष कुमार चौधरी बटैलै । यकर लाग ८ लाख २९ हजार ७९८ रुप्या बजेट छुटयाइल रहे ।
वडा नम्बर–३ मोहना लडियामे भौतिक तटबन्ध अनुगमन करल बा । उ भौतिक तटबन्ध शिवरत्नापुर गाउँहे जोगाइक लाग हुइटी रहल बा । ओकर लाग १५ लाख बजेट विनियोजन करल बा । वडा नम्बर ४ मे सुन्दरपुर शिविरसे वडा नम्बर ६ बनकट्टासम जोरना सडक निर्माणके अनुगमन करल बा । यकर लाग ९ लाख ४९ हजार ५३५ रुप्या बजेट छुटयाइल बा । यी सडक निर्माण कार्य अभिन जारी रहल बा ।
सिमरना गाउँके घुरही लडियासे भरताल बनुवा उर्मी निकरना डगरके अनुगमन करल बा । यहाँफे सडक निर्माण कार्य अभिन जारी रहल बा । यकर लाग युवा रोजगारीके लाग रुपान्तरण पहल आयोजना मार्फत ८ लाख ७१ हजार २७० रुप्या विनियोजन करल रहल बा ।
गाउँपालिका स्तरीय अनुगमन टोलिमे संयोजक भगवतीकुमारी चौधरी, पूर्वाधार विकास समिति संयोजक प्रेमबहादुर चौधरी, अनुगमन सदस्य सचिव तथा योजना शाखा प्रमुख सन्तोष कुमार चौधरी, वडा नम्बर ९ के अध्यक्ष खेमराज चौधरी अनुगमन समिति सदस्य सुनिला चौधरी, सव इन्जिनियर विपराज जोशी लगायतके उपस्थिति रहल रहे ।
