ग्रामीण समुदायमे गुणस्तरीय स्वास्थ्य सेवा डेटि निमेष अस्पताल
पहुरा समाचारदाता
कंचनपुर, २ असार । कंचनपुर जिल्लाके गुलरियामे रहल १५ शैय्याके अस्पताल गुणस्तरीय सेवा डेटी आइल बा ।
कृष्णपुर नगरपालिका वडा नम्बर ५ गुलरियामे १ करोडके लगानीमे विशेषज्ञ सेवासहितके निमेष अस्पताल प्रालि गुणस्तरीय स्वास्थ्य सेवा डेटि आइल हो ।
अस्पतालके प्रवन्ध निर्देशक गीता चौधरीके अन्सार २४ सो घण्टा इमर्जेन्सी सेवा, ओपीडी सेवा, इसीजी सेवा, विशेषज्ञ सेवा, प्रयोगशाला, रंगिन भिडियो एक्सरे लगायतके सेवा अस्पतालसे स्थानीय जन्ता ओइने पैटी बटैं ।
स्थानीय ठाउँमे अस्पताल खुलल बाड यहाँके नागरिक ओइने स्वास्थ्यमे मजा ओ हलि काम हुइना सेवा सुविधा पाइल स्थानीय अर्जुन चौधरी बटैलैं ।
उहाँ कठैं, जबसे इ निमेष अस्पताल खुलल टबसे बिमारीनहे लेके दुर जैना समस्या हटल बा उहाँ कलैं । समयमे सहि उपचार पाके ढेर मनैन जिउ ज्यान बँचल बटिन उहाँ बटैलैं ।
छोट छोट समस्या हुइलेसे फेन महेन्द्रनगर, धनगढी, नेपालगंज जाइ पर्ना उ बाध्यता अब्बे निमेष अस्पताल पुरा कर्ले बा ।
आर्थिक कम्जोर हुइल गरिब जन्तनहे विशेष छुटमे डवाइ कर्टी आइल ओहे अस्पतालके संचालक डा. फुलराम चौधरी बटैलैं ।
उहाँ कठैं, आर्थिक कम्जोर रहल मनैंन्के हम्रे इ अस्पतालसे सेक्ना सहयोग हरदम कर्टी आइल बटि ओ सेकटसम कर्टी जैना उहाँ बटैठैं ।
डा. फुलराम चौधरी ओ गीता चौधरी गोसिया ओ गोसिनियाँ हुइँट् । उहाँ कृष्णपुर नगरपालिका ६ के स्थानीय थारु समुदायके बासिन्दा हुइँट् । उहाँ डुनु जाने समाजसेबी फेन हुइँट् ।
