धनगढीमे नक्कली नोट छप्ना मेसिनसहित दुई पक्राउ

पहुरा समाचारदाता
धनगढी, २ असार । कैलालीके धनगढीमे नक्कली नोट छप्ना मेसिनसहित २ जाने पक्राउ परल बाटै । प्रहरीसे धनगढी उपमहानगरपालिका ८ के २१ वर्षीय रामदास राना ओ अनुराग रानाहे बुधके साँझ नक्कली नोट ओ नोट छप्ना प्रयोग करल सामाग्री सहित पक्राउ करल हो ।

उपचारके क्रममे अनुरागसे नक्कली १००० के नोट अस्पतालहे डेहलपाछे अस्पताल शंका लागके प्रहरीहे खबर करलपाछे वडा प्रहरी कार्यालय धनगढीके टोलीसे अनुरागहे नियन्त्रणमे लेके सोधपुछ करल रहे । सोधपुछ करेबर उ नक्कली नोट मामा नाता परुइया रामदाससे छप्ना करल बताइलपाछे प्रहरी बि युनिक फोटो स्टुडियोसे मेसिनसहित रामदासहे पक्राउ करल जिल्ला प्रहरी कार्यालय कैलालीके प्रवक्ता प्रहरी नायब उपरीक्षक (डिएसपी) बेद प्रकाश जोशी बटैलै ।

प्रहरी उहाँहुक्रनके साथसे नक्कली १ हजारके २ नोट ओ अन्य नोट फेन बरामद करलबा । उबारे थप अनुसन्धान हुइटी रहल डिएसपी जोशी बटैलै ।