बजेट कार्यान्वयन हुईः आर्थिकमन्त्री रावल
पहुरा समाचारदाता
धनगढी, २ असार । सुदूरपश्चिम प्रदेश सरकारसे प्रस्तुत करले आर्थिक वर्ष २०७९/०८० के राजस्व ओ व्ययके अनुमान (बजेट) सम्बन्धी बिफेक रोज समीक्षा कार्यक्रम हुइल बा । बुधके रोज प्रस्तुत करल बजेटके बिफेक रोज पत्रकार सम्मेलन कैके उ कार्यक्रम हुइल रहे ।
कार्यक्रममे आर्थिक मामिला मन्त्री प्रकाश रावल आर्थिक वर्ष २०७९/०८० के संक्षिप्त बजेट प्रस्तुत करटि यी बजेट कार्यान्वयन हुइना विश्वास व्यक्त करलैं । प्रदेश सरकार यी आर्थिक वर्षके लाग ३६ अर्ब ७४ करोड ६४ लाख ६५ हजार रुपियाँ बजेट विनियोजन करले बा ।
उहाँ सुदूरपश्चिम प्रदेश सरकारके बजेटमे प्रदेशके गौरवके योजना तथा बहुवार्षिक योजनालगायत सडक पूर्वाधार, कृषि, शिक्षा, स्वास्थ्यहे विशेष जोड डेहल बटैलैं । उहाँ कलैं, “यी वर्षके बजेटमे प्रदेश सरकार विद्युत उत्पादन, व्यावसायिक कृषि, उत्पादनमे लगानी, पर्यटन, प्राविधिक शिक्षा, स्वास्थ्य, उद्योगमे सहुलियत करलगायतके योजना बनैले बटि ।”
पत्रकारहुकनके प्रश्नमे मन्त्री रावल सेती प्रादेशिक अस्पताल, टीकापुर अस्पताल ओ महाकाली अस्पतालसे समन्वय कैके यिहे आर्थिक वर्षसे गेटा मेडिकल कलेज सञ्चालन करना बटैलैं । उहाँ कलैं, “गेटामे मेडिकल कलेजके लाग संरचना तयार होसेकल बा । आब उ संरचनाहे प्रदेश सरकार सदुयोग करि ।” उहाँ गेटामे मेडिकल कलेजके लाग संरचना बनसेकल ओरसे आब यहाँ कलेज सञ्चालनके बिकल्प नैरहल बटैलैं ।
उहाँ बिटल वर्षमे कुछ प्राविधिक जनशक्तिके अभावमे बजेट खर्च नैहुइसेकल कटि यी वर्षके बजेट कार्यान्वयनके लाग प्रदेश लोकसेवामार्फत जनशक्ति भर्नाके प्रक्रिया सुरु होसेकल बटैलैं । प्रदेश लोकसेवासे आइल प्राविधिक जनशक्तिसे बजेट कार्यान्वन हुइना उहाँ बटैलैं । ओस्टेक, प्राविधिक शिक्षामे वादी समुदायके लाग विशेष प्राथमिकताके साथ लागू करना बटैलैं ।
बुधके रोज सुदूरपश्चिम प्रदेशसभा बैठकमे प्रस्तुत हुइल बजेटके चालु ओर १२ अर्व २९ करोड ५९ लाख ८४ हजार अर्थात ३३ दशमलव ४६ प्रतिशत ओ पँुजीगत ओर २४ अर्व १४ करोड ४७ लाख ६१ हजार अर्थात ६५ दशमलव ७४ प्रतिशत बजेट विनियोजन करल बा । ओस्टेक, अन्तर सरकार वित्तीय हस्तान्तरण ओर १ अर्व ३६ करोड ४९ लाख अर्थात ३ दशमलव ७३ प्रतिशत बजेट विनियोजन करल आर्थिक मामिला मन्त्री रावल बटैलै ।
प्रदेश सरकारसे सडक पूर्वाधारके लाग ५ अर्ब ६० करोड ११ लाख बजेट विनियोजन करल बा कलेसे १ हजार छ सयठो बोरिङ निर्माण सँगे कृषि तथा सहकारी क्षेत्रके लाग ३ अर्ब १० करोड बजेट विनियोजन करले बा ।
अगामी आर्थिक बरसके लाग शिक्षा ओर १ अर्ब २३ करोड ७३ लाख बजेट विनियोजन करल बा । शिक्षाके गुणस्तर सुधार, आधुनिक पूर्वाधार निर्माण ओ शैक्षिक जनशक्तिके क्षमता सुधारके लाग प्रदेश प्रमुख शैक्षिक सुधार कार्यक्रम अन्तर्गत उ बजेट विनियोजन हुइल हो । ओस्टक, अगामी आर्थिक बरसके लाग स्वास्थ्य क्षेत्रके लाग एक अर्ब ६ करोड २६ लाख बजेट विनियोजन करल बा ।
स्वास्थ्य क्षेत्र ओर प्रदेशमे रहल प्रादेशिक ओ जिल्ला अस्पतालमे सेवा विस्तारके लाग उक्त बजेट विनियोजन करल हो । कलेसे थारु समुदायमे किल डेखगैल सिकलसेल एनिमियाके चेकजाँच तथा औषधीउपचारके लाग धनगढीके सेती प्रादेशिक अस्पताल ओ टीकापुर अस्पतालमेमे निःशुल्क स्वास्थ्यउपचारके व्यवस्था कैना आर्थिक मामिला मन्त्री रावल बटैलै ।
कार्यक्रममे आर्थिक मामिला राज्यमन्त्री अमरबहादुर साउँदलगायत धनगढीके टमान सञ्चारकर्मीहुकनके सहभागिता रहल रहे ।
