जिसस प्रमुख कलेलहे कैलारी गाउँपालिकामे स्वागत

पहुरा समाचारदाता
धनगढी, ३ असार । जिल्ला समन्वय समिति कैलालीके प्रमुख पदम् कलेलहे शुकके कैलारी गाउँपालिकाके कार्यालयमे स्वागत करल बा ।

गाउँपालिकाके अध्यक्ष राजसमझ चौधरी, उपाध्यक्ष भगवतीकुमारी चौधरी ओ वडा अध्यक्षहुक्रे नवनिर्वाचित जिल्ला समन्वय समितिके प्रमुखहे स्वागत करल हुइट । साथे, ओइने प्रमुख कलेलहे बधाई ज्ञापनफे करले बटै । वैशाख ३० गते हुइल निर्वाचनमे जिल्ला समन्वय समितिमे गठबन्धनके ओरसे नेपाली काँग्रेसके कलेल प्रमुखमे विजयी हुइल रहिट । उपप्रमुखमे भर गठबन्धनके माओवादी केन्द्रके खगराज भुषाल विजयी हुइल रहिट ।

काँग्रेससे कैलारी गाउँपालिकाके अध्यक्षमे विजयी हुइल अध्यक्ष चौधरीहे गठबन्धनविरुद्ध जाके उम्मेदवारी डेहल कहटी नेपाली काँग्रेससे कारबाही करल रहे । जिल्ला समन्वय समितिके निर्वाचनमे गठबन्धनहे जिटाइक लाग फे अध्यक्ष चौधरीके भोट आवश्यक रहल रहे । नेपाली काँग्रेके हाइकमाण्डके आग्रहमे उहाँ गठबन्धनके पक्षमे भोट डारल रहिट ।