धनगढी उपमहानगरपालिकाके नवनिर्मित प्रशासनिक भवनके उद्घाटन
पहुरा समाचारदाता
धनगढी, ४ असार । धनगढी उपमहानगरपालिकाके नवनिर्मित प्रशासनिक भवनके उद्घाटन हुइल बा । प्रधानमन्त्री शेरबहादुर देउवा नवनिर्मित प्रशासनिक भवनके उद्घाटन करल हुइट ।
उद्घाटन कार्यक्रममे बोल्टी उहाँ संघीय संसदके चालु अधिवेशनसे स्वास्थ्य विज्ञान प्रतिष्ठानसम्बन्धी विधेयक नन्ना बटैलै । मन्त्रीपरिषद्से हालहाली पास करके संसदके यिहे अधिवेशनमे गेटा स्वास्थ्य विज्ञान प्रतिष्ठानसम्बन्धी विधेयक नन्नाफे उहाँ बटैलै ।
कार्यक्रममे सुदूरपश्चिम प्रदेशके मुख्यमन्त्री त्रिलोचन भट्ट प्रदेश सरकारके समेत साझेदारीमे गेटामे हाली मेडिकल कलेज सञ्चालन, तीनु तहके सरकार, नीजि क्षेत्र ओ नागरिकके साझेदारीमे पश्चिम सेती जलविद्युत परियोजना सञ्चालन करे पर्ना, पश्चिम सेती, लोकमार्ग तथा द्रुत मार्ग निर्माण कार्य हाली पुरा कैना आग्रह करलै ।
धनगढी उपमहानगरपालिकाके नगरप्रमुख गोपाल हमाल गेटामे सेकटसम चिकित्सा विश्वविद्यालय बनाई पर्ना माग रख्लै । उहाँ कहलै, ‘गेटामे चिकित्सा विश्वविद्यालय बनाइ परल, यदि तत्काल सम्भव नइहो कलेसे स्वास्थ्य विज्ञान प्रतिष्ठान आघे बढाइए परल, यी आम नागरिकके भावना ओ आवाज हो ।’
धनगढीके व्यवस्थित तथा योजनावद्ध विकासके लाग पञ्चवर्षीय गुरुयोजना निर्माण हुइटी रहल बा,’ नगर प्रमुख हमाल कहलै, ‘धनगढी सुदूरपश्चिम प्रदेशके सक्कुहुनके साझा शहर हो । यिहीहे सुन्दर ओ व्यवस्थित बनैना जिम्मेवारी तीनु तहके सरकार तथा आम नागरिकके हो ।’
धनगढी उपमहानगरपालिकाके नवनिर्मित प्रशासनिक भवन ७ करोड २३ लाख ४५ हजार १३७ रुप्या बजेटमे निर्माण हुइल हो ।
