‘नगर विकासके लाग सबके सहकार्य आवश्यक’
पहुरा समाचारदाता
अत्तरिया, ४ असार । कैलालीके गोदावरी नगरपालिकाके नगरप्रमुख विरेन्द्र भट्ट नगरके विकासके लाग सबके सहकार्य ओ ऐक्यवद्धता आवश्यक रहल बटैले बाटै ।
शनिच्चरके गोदावरी नगरपालिका वडा नं. १० के वडाभेलाहे सम्बोधन कैटी नगरप्रमुख भट्ट राजनितिक प्रतिशोध नैलेके सबजे मिलके गैलेसे किल समृद्ध नगर निर्माण कैना सम्भव हुइना बटैलै ।
‘हम्रे चुनावके समयमे टमान पार्टीसे उम्मेदवार बन्ली, चुनाव लड्ली । मने अब्बे जिटके आके जनप्रतिनिधि पार्टीगत नैहोके जनताके हुइट,’ उहाँ कहलै, ‘ओहेमारे नगरके विकासके लाग पार्टीगत रुपमे नैहोके सबजे मिलके जैना जरुरी रहल बा ।’
उहाँ जनतासे जौन आशा ओ भरोसाके साथ जिटाके पठैले बाटै उ आशा ओ भरोसाहे निरासामे परिणत हुइ नैडेना जनप्रतिनिधिके कर्तव्य रहल बटैलै ।
‘जनप्रतिनिधि काम कैटी जाइबर कबुकाल सबके चित्त नैबुझे सेकठ्, ओइसीन अवस्थामे सक्कु जाने सल्लाह सुझाव डेके आघे बह्रलेसे अवश्य नै विकास सम्भव रहल बा,’ उहाँ कहलै ‘मने यहाँ काम कैना बेला त्रुटि होके खोईरो खन्ना काम किल हुइठ् ।’ उहाँ समाज रुपान्तरणके लाग राजनितिक रुपमे सबके सोच सकारात्मक हुइना आवश्यक रहल बटैलै ।
उहे बीच वडा नम्बर १० से आर्थिक वर्ष २०७९/०८० के लाग ९६ लाख ९६ हजार के बजेट प्रस्तुत करले बा । नगरपालिकासे पठाइल बजेट सिलिङ अनुसार वडासे ९६ लाख ९६ हजार ३१ रुपैया बराबरके बजेट प्रस्तुत करल हो ।
बजेटमे वडासे सबसे ढिउर पुर्वाधार विकासमे खर्च कैना हुइल बा । भौतिक पुर्वाधार विकासमे वडासे ५० लाख रुपैया विनियोजन करले बा । उक्त बजेटसे वडामे नाली सहितके पिँच सडक ओ सिँचाई अन्तरगत मोटर खरिद कैना वडाध्यक्ष रविन्द्र शाही बटैलै ।
उहाँ नाली सहितके पिँच सडकके लाग ४० लाख ओ मोटर खरिदके लाग १० लाख विनियोजन करल बटैलै । ओस्टके वडासे सामाजिक विकास ओर २८ लाख ७५ हजार रुपैया बजेट विनियोजन करले बा ।
उक्त रकमसे वडामे खानेपानी, विद्यालय व्यवस्थापन लगायतके कार्य करजैना वडाध्यक्ष शाही बटैलै । वडासे संस्कृति प्रर्वद्धनके लाग ६ लाख ७५ हजार रुपैया बजेट विनियोजन करले बा । उक्त रकमसे चौधरी समुदायके अधुरो भवन निर्माण ओ मठ मन्दिर निर्माण कैना बटाइल बा ।
