मच्छी पोखरीके अनुगमन

पहुरा समाचारदाता
हसुलिया, ५ असार । कैलालीके कैलारी गाउँपालिका वडा नम्बर ५ ओ ७ मे रहल मच्छी पोखरीके अनुगमन करल बा ।

गाउँपालिका उपाध्यक्ष तथा अनुगमन समिति संयोजक भगवतीकुमारी चौधरी सहित प्राविधिक टोली मच्छीपालन योजनाके स्थलगत अनुगमन करल हो । गाउँपालिका स्तरीय अनुगमन समुहसे आर्थिक वर्ष २०७८/७९ के वार्षिक बजेटसे पालिकाका वडा नम्बर ५ ओ ७ मे निर्माण हुइल मच्छीपालन पोखरीके गुणस्तर रहल/नइरहल बारेमे अनुगमन करल बा ।

निर्माणा हुइल योजनाके काम सन्तोषजनक हुइलेसेफे कुछ पोखरी निर्माणके काम सुधार करे पर्ना उपाध्यक्ष भगवतीकुमारी चौधरीले बटैली । अनुगमनमे सहभागी पशु शाखाके पशु चिकित्सक सूर्यप्रसाद चौधरी स्टमेट अनुसार काम हुइल मने ढेर जैसिन पोखरी दर्ता नइहुइल ओरसे दर्ता कैना सुझाव डेहल बटैलै ।

गाउँपालिका स्तरीय अनुगमन टोलीमे गाउँपालिका उपाध्यक्ष तथा अनुगमन समिति संयोजक भगवतीकुमारी चौधरी, आर्थिक विकास समितिके संयोजक तथा वडा नम्बर ५ अध्यक्ष विष्णुप्रसाद चौधरी, भौतिक पूर्वाधार विकास समितिके संयोजक तथा वडा नम्बर ६ के अध्यक्ष प्रेमबहादुर चौधरी, पशु शाखाके पशु चिकित्सक सूर्यप्रसाद चौधरी, योजना शाखा प्रमुख सन्तोषकुमार चौधरी, अनुगमन समिति सदस्य सुनिला चौधरी, नप्रससप्र दिपेन्द्र चौधरी लगायतसे सहभागिता रहे ।