विकास निर्माण योजनाके अनुगमन

पहुरा समाचारदाता
हसुलिया, ७ असार । कैलालीके कैलारी गाउँपालिकामे हुइल विकास निर्माणके योजनाके गाउँपालिका स्तरीय अनुगमन समुहसे अनुगमन करले बा ।

गाउँपालिका उपाध्यक्ष तथा अनुगमन समिति संयोजक भगवतीकुमारी चौधरी सहित प्राविधिक टोलीसे मंगरके रोज योजनाके स्थलगत अनुगमन करल हो । गाउँपालिका स्तरीय अनुगमन समुहसे आर्थिक वर्ष २०७८÷७९ के वार्षिक बजेटसे पालिकाके टमान वडामे सञ्चालित निर्माणाधीन योजनाके गुणस्तर रहल÷नइरहल बारे अनुगमन करल समिति संयोजक चौधरी बटैली ।

गाउँपालिका स्तरीय अनुगमन समुहसे कैलारी गाउँपालिका वडा नम्बर ८ दुधिया गाउँमे प्रदेश पूर्वाधार विकास कार्यक्रम अन्र्तगत १५ लाख ४ हजार बजेटमे हुइल सडक स्तरोन्नतीके अनुगमन करले बा । वडा नम्बर १ बरुवा नालामे बनल २३ लाख १० हजार १ सय रुप्यामे बनल कल्भर्टके टोलीसे अनुगमन करले बा । कल्भर्ट निर्माणके लाग प्रदेश पूर्वाधार विकास कार्यक्रम अन्र्तगत १८ लाख ओ गाउँपालिकाके वडा नम्बर १ से ५ लाख १० हजार एक सय बजेट छुटयाइल रहे ।

ओस्टेक करके टोलीसे सुर्मी जंगलसे वनकट्टासम डगर चौडाई तथा मर्मत योजनाके अनुगमन करले बा । ओकर लाग ५ लाख २२ हजार ७६२ रुप्या विनियोजना हुइल रहे । वडा नम्बर ८ दुधिया गाउँ हर्खोली जैना डगर चौडाई तथा मर्मत योजनाके अनुगमन करल बा । डगर चौडाई तथा मर्मत योजनाके लाग ५ लाख ८८ हजार १०७ रुप्या बजेट विनियोजन हुइल रहे ।
कैलारी–२ मे गाउँपालिकाके १५ लाख बजेटमे बनल जनचेतना सहकारी भवनके अनुगमन करल बा । गाउँपालिका स्तरीय अनुगमन समुहसे वडा नम्बर २ रामपुरमे हरियाली क्लव भवनकेफे अनुगमन करल बा । यकर लाग प्रदेश पूर्वाधार विकास कार्यक्रम अन्र्तगत १० लाख बजेट विनियोजना हुइल रहे । यी दुनु भवनके लेन्टर नइखोलल ओरसे सम्पन्न नइहुइल समुहके सदस्य सचिव तथा योजना शाखा प्रमुृख सन्तोषकुमार चौधरी बटैलै ।

ओस्टेक करके वडा नम्बर १ विसनपुर कटानमे अनुगमन करल क्रमागत योजना सामुदायिक भवनकेफे कुछ काम बाँकी रहल बा । यकर लाग गैल बर्ष ६ लाख ओ यी बर्ष ११ लाख बजेट विनियोजना हुइल बा ।

निर्माण हुइल योजनाके कुछ काम सन्तोषजनक हुइलेसेफे कुछ योजनाके काम स्टमेट अनुसार हुइना बाँकी रहल उपाध्यक्ष भगवतीकुमारी चौधरी बटैली । पालिकामे सञ्चालित योजना गाउँपालिकाके बजेट, प्रदेश पूर्वाधार विकास कार्यक्रम बजेट, प्रधानमन्त्री स्वारोगार कार्यक्रम बजेटसे आम नागरिकके लाग रहल उहाँ बटैली ।

अनुगमनमे सहभागी योजना शाखा प्रमुख सन्तोषकुमार चौधरी कुछ योजनाके काम प्राविधिक स्टमेट अनुसार नइपाइल ओरसे सुधार कैना सुझाव डेहल बटैलै । उहाँ स्टमेट अनुसार कुछ योजनाके काम बाँकी रहल ओरसे समयमे सेक्ना निर्देशन समेत डेहल बटैलै ।

अनुगमन समुहमे पूर्वाधार विकास समिति संयोजक तथा वडा नम्बर ६ के अध्यक्ष प्रेमबहादुर चौधरी, अनुगमन समुहके सदस्य सुनिला चौधरी, प्राविधिक विशेष चौधरी, संजय कठरियालगागतके सहभागिता रहल रहे ।