यौनिक तथा लैङिक अल्पसंख्यक समुदाय लक्षित बजेट विनियोजन माग
पहुरा समाचारदाता
हसुलिया, ८ असार । अइना आर्थिक बर्षके बजेटमे यौनिक तथा लैङिक अल्पसंख्यक समुदायहे लक्षित करके कार्यक्रम नन्ना माग करल बा ।
यौनिक तथा लैङिक अल्पसंख्यक समुदायके अधिकारके क्षेत्रमे काम कैना संघ संस्थासे गाउँपालिकाके अध्यक्ष राजसमझ चौधरी, उपाध्यक्ष भगवतीकुमारी चौधरीलगायत वडाध्यक्षहुकनहे अलग अलग रूपमे ज्ञापनपत्र बुझैटी अइना आर्थिक बर्षके बजेटमे यौनिक तथा लैङिक अल्पसंख्यक समुदायहे लक्षित करके कार्यक्रम नन्ना माग करल हो ।
सुदूरपश्चिम समाज, नील हिरा समाज, मितिनी नेपाल ओ एकता नेपालसे संयुक्त रुपमे गाउँपालिकाहे ज्ञापनपत्र बुझटी यौनिक तथा लैङिक अल्पसंख्यक समुदायके अधिकारके क्षेत्रमेफे कार्यक्रम ओ बजेट विनियोजनके मागर करल निल हिरा समाज कैलालीके अध्यक्ष आशिका चौधरी बटैली ।
गाउँपालिकाहे बुझाइल ज्ञापनपत्रमे विद्यालय तथा कलेजमे शिक्षक, विद्यार्थीहुकन यौनिक तथा अल्पसंख्यक समुदायबारे अभिमुखीकरणके माग करल बा । ओस्टेक वडा स्तरमे ओ गाउँपालिकास्तरमे कार्यपालिका सदस्य, वडा सदस्यहुकनहे यौनिक तथा लैङिक अल्पसंख्यक समुदायमे रहल समस्या, चुनौतीबारे सचेतीकरण कार्यक्रम, सहजे रुपमे अन्यके रुपमे नागरिकता प्राप्तीके लाग वडास्तरमे यी बारे सचेतीकरण कार्यक्रम नन्ना माग करल बा ।
ज्ञापनपत्र एकता नेपालके अध्यक्ष कृति चौधरी, सुदूरपश्चिम समाजके सचिव राज चौधरी, सदस्य निरङ चौधरी, निल हिरा समाजके अध्यक्ष आशिका चौधरी, सुदूरपश्चिम समाजके सदस्य गंगा चौधरी लगायतसे बुझागिल रहे ।
