सात गोरुगाडा सहित ३० थान सालके गोलिया बरामद

पहुरा समाचारदाता
धनगढी, १० असार । कैलालीमे सात गोरुगाडा सहित ३० थान सालके गोलिया बरामद करल बा । जिल्लाके बर्दगोरिया गाउँपालिका वडा ३ रानिकुन्डाके खल्ला खेट्वासे शुकके सकारे ४ बजे गोरु गाडामे लोड करल लन्टी रहल अवस्थामे सब डिभिजन बन कार्यालय बर्दगोरिया ओ सब डिभिजन बन कार्यालय साडेपानीसे उ काठ बरामद करल हो ।

ओस्टके तीन जाने पक्राउ परल बाटै । पक्राउ परुइयामे बर्दगोरिया वडा ६ विशालनगर बैठुइया ४० वर्षीय दीर्घ बिक, ३८ वर्षीय रमेश बिक ओ ३६ वर्षीय अर्जुन बिक रहल बाटै । बाँकी चार जाने भर फरार रहल बुझल बा ।

बरामद करल काठ, गोरुगाडा सब डिभिजन बन कार्यालय बर्दगोरिया कम्पाउन्डमे राखल बा । पक्राउ परल तीन जनहनहे थप कानुनी कारबाहीके लाग डिभिजन वन कार्यालय धनगढी चलान करल डिभिजन बन कार्यालय पहलमानपुर प्रमुख गोकुल रिजाल बटैलै ।