टीकापुर नगरपालिकाके बजेट ८५ करोड ८ लाख रुपियाँ

पहुरा समाचारदाता
टीकापुर, १० असार । कैलालीके टीकापुर नगरपालिका ५ करोड रुपैयाँके बजेट लन्ले बा । आर्थिक बरस २०७९/०० के लाग नगर उपप्रमुख खडकबहादुर शाहसे ८५ करोड ८ लाख ८४ हजार १६० रुपैयाँके बजेट प्रस्तुत करल हुइट ।

११ औं नगरसभामे प्रस्तुत बजेटमे संघीय अनुदानसे वित्तीय समानीकरणमे २१ करोड १९ लाख, सशर्त अनुदानमे चालु २६ करोड ३४ लाख ओ पुँजीगत ४ करोड ६६ लाख, राजश्व बाँडफाँडमे १४ करोड २१ लख ५८ हजार, विशेष अनुदानमे २ करोड ओ समपुरक अनुदानमे ८० लाख रुपैयाँ सीमा अनुमान करल बा ।

ओस्टके सुदूरपश्चिम प्रदेश सरकारसे वित्तीय समानीकरणमे १ करोड ५७ लाख ९७ हजार, राजश्व बाँडफाँडमे ९१ लख ५९ हजार, समपुरकमे ३० लाख ओ विशेष अनुदानमे ५० लाख सीमा अनुमान करल बा । नगरपालिकाके आन्तरिक श्रोतसे ७ करोड ५० लाख ७० हजार १ शय ६० रुपैयाँ, मालपोत रजिष्ट्रेसन ३ करोड ७५ लाख, बचत हुइना अनुमान ८२ लाख ओ वन रोयल्टीसे २० लाख प्राप्त हुइना अनुमान करल बा ।

बजेटमे विपद व्यवस्थापन कोषमे १ करोड ५० लाख, समपुरक कोषमे ७ करोड विनियोजन करल बा । आघेक आर्थिक बरस जनतासँग जनप्रतिनिधि कार्यक्रम, अनाथ असहाय छात्रवृत्ति, महिला हिंसा न्यूनिकरण, सडक मानवमुक्त नगर, सामुदायिक पशु व्यवस्थापन, निःशुल्क रक्त संचार, होम टु हस्पिटल, टीकापुर अस्पताल चिकित्सक सहयोग, प्राविधिक शिक्षा छात्रवृत्ति, हाम्री छोरीः प्यारी छोरी, उज्यालो टीकापुर ओ आमा बुवासँग उपमेयर जैसिन कार्यक्रमहे फेन निरन्तरता डेहल बा ।