गोदावरी नगरपालिकासे १ अर्ब २५ करोड ८ लाख रुपियाके बजेट प्रक्षेपण
पहुरा समाचारदाता
धनगढी, १० असार । गोदावरी नगरपालिकासे आगामी आर्थिक बरस २०७९/०८० के लाग १ अर्ब २५ करोड ८ लाख ५० हजारके बजेट प्रक्षेपण करले बा ।
शुकके नगरप्रमुख बिरेन्द्र भट्ट आठौँ नगरसभामे उक्त बजेट प्रस्ताव करल हुइट । उहाँ उक्त बजेट प्राप्तीके लाग नेपाल सरकारसे प्राप्त हुइना संघीय बित्तिय समानीकरण से २१ करोड ४४ लाख, संघीय राजस्व बाँडफाँडसे १७ करोड ३६ लाख ८९ हजार , संघीय सशर्त अनुदानसे ३७ करोड ५ लाख प्राप्त हुइना बटैले बाटै ।
ओस्टके संघीय बिशेष अनुदानसे २ करोड, संघीय समपुरक अनुदानसे १ करोड ४० लाख, प्रदेश बित्तिय समानिकरणसे १ करोड ६० लाख १० हजार, प्रदेश राजस्व बाँडफाँडसे ५९ लाख ४९ हजार, स्थानीय राजस्वसे ६ करोड ९ लाख ९५ हजार ५ सय, आन्तरिक स्रोतसे ११ करोड ५३ लाख ६ हजार ५ सय ओ संञ्चित कोषसे २६ करोड प्राप्त हुइना बजेटमे उल्लेख करल बा ।
उहे बीच मालाखेती अस्पतालहे विशेषज्ञ सेवा सहितके सर्पदंस उपचार केन्द्रके रुपमे विस्तार कैना हुइल बा । नगरप्रमुख भट्ट आपन नीति तथा कार्यक्रममे मालाखेती अस्पतालहे विशेषज्ञ सेवा सहित सुद्रिढीकरण तथा सर्पदन्स उपचार केन्द्रके रुपमे विकास कैना बटैलै ।
ओस्टके नेपाल रेडक्रस शाखा, अत्तरियामे ब्लड बैंक स्थापनाके सरुवात कैना, आयुर्वेद लगायतके स्वास्थ्य पद्दतीके संरक्षण, प्रबर्दधन तथा विस्तार कैना, शुन्य होम डेलिभरीके नीति लन्ना, बर्थिङ्ग सेन्टरके सेवा विस्तार कैना ओ स्वास्थ्यमे सर्वव्यापी पहुँचके अवधारणा अनुरुप उपचारात्मक सेवाहे विकास कैना ग्रामीण अल्ट्रासाउण्ड कार्यक्रम लागु कैना नीति तथा कार्यक्रममे उल्लेख करल बा ।
