जोशीपुरसे ४८ करोड ११ लाखके बजेट प्रस्तुत
पहुरा समाचारदाता
जोशीपुर, १० असार । कैलालीके जोशीपुर गाउँपालिकासे आगामी आर्थिक बरस २०७९/८० के लाग ४८ करोड ११ लाख १० हजार ५ सय रुपैयाँ बजेट सार्वजनिक करले बा ।
गाउँपालिका अध्यक्ष चित्र बहादुर चौधरीके अध्यक्षतामे हुइल आठौं गाउँ सभासे उपाध्यक्ष रेखा देवी कठरिया आगामी आर्थिक बरसके बजेट प्रस्तुत करल रहिट ।
‘समृद्ध ओ आत्म निर्भर जोशीपुर गाउँपालिकाके निर्माण कैना, आर्थिक भौतिक तथा सामाजिक पूर्वाधार विकास कैटी समृद्ध, समुन्नत ओ आत्म निर्भर गाउँपालिकाके निर्माण’ कैना नारा सहित गाउँपालिकाके नीति तथा कार्यक्रम फेन लानगैल बा ।
ओस्टके कृषि क्षेत्रके आधुनिकिकरण, विविधिकरण ओ बजारीकरणके व्यवस्था कैटी कृषि पेशाहे सम्मानजनक पेशाके रुपमे विकास कैटी रोजगारीके आधारके रुपमे विकास कैना, उपलब्ध स्रोत साधन, अवसर ओ क्षमताके उच्चतम उपयोग तथा न्यायिक वितरण कैटी सामाजिक न्याय सहित लोक कल्याणकारी राज्य व्यवस्थाके निर्माण कैना फेन उल्लेख करल बा ।
ओस्टके नीति तथा कार्यक्रममे चरम गरिवीके अन्त्य ओ पिछरल क्षेत्र, वर्ग ओ समुदायके सिघ्र उत्थान कैटी समाजिक सुरक्षाके विस्तार सहित लोक कल्याणकारी राज्य व्यवस्थाके निर्माण कैना, गुणस्तरिय शिक्षा, स्वास्थ्य, खानेपानी लगायतके सामाजिक ओ कृषि, पर्यटन लगायतके आर्थिक पूर्वाधार विकास ओ अधुरा आयोजनाके कार्यान्वयन कैना, विधीके शासन, सार्वजनिक सेवा प्रभावकारीता, जवाफदेहिता ओ विकासमे जन सहभागिता मार्फत नागरिकहे प्रत्याभुती हुइना सुशासन प्रवर्धन कैना, सार्वजनिक सेवा प्रवाहहे छिटो छरिटो ओ भरपर्दो बनाइक लाग गाउँपालिका ओ सक्कु वडाके सेवा प्रवाहमे सूचना प्रविधिके प्रयोगमे जोड डेना लगायत रहल बा ।
गाउँपालिकासे चालु बरसके २०७८/०७९ के जेठ मसान्तसम चालु खर्च ६८.६५ प्रतिशत, पुँजिगत खर्च ३८.६७ प्रतिशत खर्च हुइल बा । ओस्टके गाउँपालिकाके आन्तरिक आम्दानी १ करोड २३ लाख ४८ हजार ३०६ रहल बा । विषयगत क्षेत्रगत रुपमे आर्थिक विकास ओर ३५.५४ प्रतिशत, सामाजिक विकास ओर ६९.५९ प्रतिशत, पूर्वाधार विकास ओर ३७.७२ प्रतिशत सुशासन तथा संस्थागत विकास ओर ६४.६१ प्रतिशत ओ कार्यालय सञ्चालन ओर ६५.५३ प्रतिशत खर्च हुइल जनाइल बा ।
