कैलारीमे बाढ ओ आगलागीमे आधारित कृत्रिम घटना अभ्यास
पहुरा समाचारदाता
हसुलिया, १२ असार । कैलालीके कैलारी गाउँपालिका–७ विपतपुरमे बाढ ओ आगलागीमे आधारित जिल्ला स्तरीय कृत्रिम घटना अभ्यास करल बा ।
जिल्ला विपद व्यवस्थापन समिति कैलालीके आयोजनामे बाढ ओ आगलागीमे आधारित कृत्रिम घटना अभ्यास करल हो । उ अभ्यासमे आगलागी ओ बाढ प्रकोप आइलपाछे बाँच्न उपायबारे स्थानीयहुकनहे जानकारी डेहल रहे । साथे नेपाली सेना, नेपाल प्रहरी ओ शसस्त्र प्रहरीसे आगलागी ओ बाढ आइलपाछे बाँच्न उपाय, नियन्त्रण कैना अभ्यास करके डेखाइल कैलारी गाउँपालिकाके प्रवक्ता तथा वडा नम्बर ७ के अध्यक्ष दिपेन्द्र बहादुर बम बटैलै ।
कैलाली जिल्लाके कैलारी गाउँपालिका–७ बाढ डुबानके उच्च जोखिममे रहल ओ गैल बैशाख ११ गते कैलारी–७ विपतपुरमे आगलागी हुके ७१ घरधुरी मन्से ३७ घर पूर्णरुपमे जरके नष्ट हुइल ओ बाँकी घरमेफे क्षति पुगल प्रवक्ता बम बटैलै ।
कार्यक्रममे कैलारी गाउँपालिकाके अध्यक्ष राजसमझ चौधरी मनसुन सुरुसंगे कैलारीके टमान ठाउँमे बाढके जोखिम बढल बटैलै । उहाँ कहलै कैलारी–७ बाढके साथे आगलागीके समेत जोखिममे रहल ओरसे विपतपुरहे टर्गेटमे धारके बाढ ओ आगलागीमे आधारित जिल्ला स्तरीय कृत्रिम घटना अभ्यास करल हो । स्थानीयहुकनके जनसहभागितामे यैसिन अभ्याससे बाढ ओ आगलागीके प्रकोपसे बाँच्न ओ न्यूनिकरणमे सहयोग मिल्न अध्यक्ष बटैलै ।
कैलारी गाउँपालिकामे अग्नी नियन्त्रक दमकल नइहुइल कारण विपतपुरमे आगलागिसे भारी क्षति व्यहोरल रहे, अइना आर्थिक बर्षके बजेटमे दमकल खरिदके लाग ३५ लाख बजेट छुटयाइल अध्यक्ष राजसमझ चौधरी बटैलै ।
कार्यक्रममे गाउँपालिका उपाध्यक्ष भगवतीकुमारी चौधरी, कैलाली जिल्लाके प्रमुख जिल्ला अधिकारी किरण थापा, कैलालीके प्रहरी प्रमुख सोमेन्द्र सिंह राठौर, सशस्त्र प्रहरीके एसपी धनबहादुर सिंह, नेपाली सेनाके सेनानी नवराज नाथ, नेपाल रेडक्रस सोसाइटीके जिल्ला सभापति उत्तम जोशी, महामन्त्री लोकराज जोशी, यूएनडिपी, मर्सिकोर, लुथरन विश्व फेडरेशन, वल्र्ड भिजन इन्टरनेशनल,कैलारी गाउँपालिका कर्मचारी, जिल्ला प्रशासन कार्यालयके कर्मचारी, स्थानीयबासी, नेपाल प्रहरी, सशस्त्र प्रहरी, नेपाली सेनाके उपस्थिति रहल रहे ।
