कैलारीमे धान दिवस मनागिल
पहुरा समाचारदाता
हसुलिया, १५ असार । कैलालीके कैलारी गाउँपालिका वडा नम्बर १ विसनपुरमे १९औँ राष्ट्रिय धान दिवस मनागिल बा ।
हिमशिखर बहु उद्देश्यीय सहकारी लिमिटेडके आयोजना तथा गाउँपालिका अध्यक्ष राजसमझ चौधरीके प्रमुख आतिथ्यमे १९औँ राष्ट्रिय धान दिवस मनागिल हो ।
धान दिवस कार्यक्रममे हिमशिखर बहु उद्देश्यीय सहकारी लिमिटेडके अध्यक्ष दुर्गा भण्डारी, प्रवन्धक महेन्द्र शाही, हसुलिया शाखा प्रमुख यूवराज जोशी, कैलारी गाउँपालिका वडा नम्बर ७ के अध्यक्ष दिपेन्द्र बहादुर बम, वडा नम्बर १ के अध्यक्ष हरि धोजपाल बोहरा लगायतके उपस्थिति रहल रहे ।हिमशिखर बहु उद्देश्यीय सहकारी लिमिटेडके अपन विउ प्रशोधन केन्द्र रहल ठाउँ विसनपुरमे दिवस मनाइल बा ।
धान दिवसहे रोपाइँ दिवसफे कहठै । असार १५ गते नेपालमे दही चिउरा खैना चलनसमेत चल्टी आइल बा । चिउरा धान कुटके तयार पर्ना खाद्यान्न हो । नेपालीके प्रमुख खाद्यन्न बाली धानके गरिमा ओ महत्व अर्थतन्त्रसंग जोरल बा । धानके उत्पादन बह्रेबेर कूल गार्हस्थ्य उत्पादन (जिडिपी) मे बढोत्तरी हुइठ कलेसे घटेबेर जिडिपी घट्ना करल पाइल बा ।
विश्व खाद्य सुरक्षाके दृष्टिकोणसे धान महत्वपूर्ण अन्न बाली हो । विश्वके झन्डे चार अर्ब जनसख््याके आधारभूत खाद्यान्न चाउल हो । धानके नेपालमे आर्थिक, सामाजिक तथा सांस्कृतिक रुपमे महत्व बा । नेपालमे १३० जातके धानके बीउ सिफारिस हुसेकल बा ।
नेपालमे कूल खेतीयोग्य जमिनमन्से ४७ प्रतिशत जमिनमे रोपाइँ हुइठ । जौन मन्से तराई क्षेत्रके हिस्सा ७० प्रतिशतसे उप्पर बा । नेपालमे कूल खेतीयोग्य जमिन करिब ३१ लाख हेक्टर रहल बा ।
