जेठ महिनामे २ सय महिला तथा बालिकाउप्पर हिंसा

५० प्रतिशत हिंसा घरभिटर
पहुरा समाचारदाता
धनगढी,१६ असार । ओरेक नेपालसे जेठ महिनामे २०० महिला तथा बालिकाउप्पर टमान खाले हिंसा हुइल जनैले बा कलेसे ५० प्रतिशत हिंसा घरभिटरसे हुइल पाइल कहले बा ।

संस्थामे अभिलेखिकरण करल (१६९) तथा टमान राष्ट्रिय पत्रपत्रिकासे प्राप्त (३१) घट्नाके आधारमे २०० ठो लैङिक विभेदमे आधारित हिंसाके तथ्याङक संकलन करल कार्यकारी निर्देशक लुभराज न्यौपाने बटैलै ।
हरेक महिना जस्टे जेठ महिनामे अभिलेखीकरण हुइल घट्नाहे विश्लेषण करेबेर समग्र तथ्याङके १०० जाने (५० प्रतिशत) महिला तथा बालिकाउप्पर घरेलु हिंसा हुइल, घरेलु हिंसा मन्सेफे सबसे ढेर ३७ जाने महिला तथा बालिकाहे श्रोत साधनसे वञ्चितीकरणमे परल निर्देशक न्यौपाने बटैलै । कुहीहे खान लगाई नइडेहे घरनिकाला करके वेवास्ता करल बा,’ उहाँ कहलै, ‘केक्रो बच्चनके पढाई लेखाईके लाग खर्च नइडेहल । कोई नागरिकता नइबनाडेहल घटना संकलन कैगिल बा ।’ ३६ जाने महिला शारिरिक हिंसाके सिकार हुइना बाध्य हुइल बटै, तथ्याङकसे प्रत्येक व्यक्तिके लाग घर सुरक्षित हुई पर्ना हो मने घरभिटर महिला बालिका आउर ढेर असुरक्षित ओ हिंसाके जोखिममे रहल विल्गाइठ । महिला तथा बालिकामे गालीगलौज तथा अपशब्द प्रयोग, टमान खाले बाहानामे चारित्रिक आरोप लगैना, कुहीहे भोजपाछे अलपत्र पारल ओ हिंसा करके यातना डेहल तथ्याङकसे डेखाइठ ।

घरेलु हिंसाके घटना बाहेक जेठ महिनामे ओरेकसे अभिलेखीकरण करल तथ्याङकहे विश्लेषण करेबेर ५३ जाने (२७ प्रतिशत) महिला तथा बालबालिका उप्पर यौन हिंसा हुइल बा । जौन मन्से २३ ठो (१२ प्रतिशत) बलात्कारके घटना तथ्याङकसे डेखाइठ । बलात्कारके घटनामे १ जाने नाबालिकके बलात्कार पाछे हत्या हुइल बा । २८ ठो (१४ प्रतिशत) सामाजिक हिंसाके घटना संकलन हुइल ओरेक नेपाल जनैले बा ।

ओस्टेक करके २० ठो (९ प्रतिशत) यौन दुव्र्यवहारके घटना, ८ ठो (४ प्रतिशत) हत्याके घटना, ओ २ ठो (१ प्रतिशत) मानव वेचविखन जैसिन जघन्य अपराधके घटना संकलन हुइल बा । जेठ महिनाके हिंसाके तथ्याङक हेरेबेर १०० जाने महिला तथा बालबालिका उप्पर घरेलु हिंसा हुइल विल्गाइठ । सबसे ढेर ३८ जनहनहे श्रोत साधनसे वञ्चितीकरणमे परल, ३६ जाने उप्पर शारिरिक हिंसा हुइल, १७ जाने महिला मौखिक दुव्र्यवहार भोगल ओ ९ जाने चारित्रिक आरोप जैसिन हिंसा सहे परल बटागिल बा ।

जेठ महिना के घट्नाके तथ्यांक हेरेबेर कुल ३७ जाने महिला तथा बालबालिका श्रोत साधनसे वञ्चित हुइल विल्गाइठ । जौन मन्से १७ जाने (४६ प्रतिशत) महिला तथा बालबालिकाहे खैना लगैनासे वञ्चित करल पाइल बा । जेम्ने प्राय जैसिन महिलाके गोसिया वैदेशिक रोजगारमे जाके बेवास्ता कैना ओ खर्च नइपठैना करल घट्ना समावेश हुइल ओरेक जनैले बा । बहुविवाह करके छोरल ओ कोई बेपत्ता हुइल घट्नाफे दर्ता हुइल बा । ३ जाने (८ प्रतिशत) महिलाहे गोसियासे नागरिकता नइबनाडेहल ओ ३ जाने (८ प्रतिशत) हे विवाहदर्ता नइकरडेहल तथ्याङक डेखैले बा । ओस्टेक करके २ जाने (५ प्रतिशत) बालबालिकाहे पढाइ लिखाइमे लग्ना खर्च नइडेके शिक्षासे वञ्चित करल ओ १० जाने (२७ प्रतिशत) महिला तथा बालबालिकाहे गोसिया तथा परिवारसे माया, स्याहारसे वञ्चित करल, सन्तानके नाता प्रमाणित नइकरल अवस्था रहल जनागिल बा ।

तथ्याङक हेरेबेर १०० जाने महिला तथा बालबालिकाउप्पर घरेलु हिंसा हुइल रहे । जौन मन्से लगभग आधा जैसिन प्रभावित (४५ प्रतिशत) २६ से ३५ वर्ष उमेर समुह रहल बटै । ओस्टेक करके ३६ प्रतिशत १६ से २५ वर्ष, १२ प्रतिशत ३६ से ४५ वर्ष ओ ७ प्रतिशत ४५ से उप्परके रहल बटै ।
घरेलु हिंसा प्रभावितके आरोेपितसंगके सम्बन्ध हेरेबेर दुइ तिहाईसे ढेर ८६ प्रतिशत गोसियासे ओ १४ प्रतिशत परिवारके सदस्यसे हिंसा हुइल ओरेकके तथ्याङकसे डेखाइठ ।