जानकीमे आपन नाउँः आपन रुख्वा कार्यक्रम सुरु
पहुरा समाचारदाता
टीकापुर, १९ असार । कैलालीके जानकी गाउँपालिकासे आपन नाउँः आपन रुख्वा कार्यक्रम सुरु करले बा ।
गाउँपालिकाका योजना तथा पूर्वाधार शाखा प्रमुख इञ्जीनियर योगेन्द्र शाही आपन जन्मदिनके अवसर पारके कटासेस्थित खेलमैदानमे रुख्वा लगाके उ अभियानके सुरु करल हुइट ।
गाउँपालिकासे आव २०७९/८० के नीति तथा कार्यक्रममे वन वातावरण तथा विपद् व्यवस्थापनके लाग पालिकाहे हरित गाउँपालिका बनैना आपन नाउँ: आपन रुख्वा कार्यक्रम आघे सारल रहे । वडा नं ९ स्थित कटासे फुटबल मैदानमे इञ्जीनियर शाही सीता अशोकके चारठो रुख्वा लगैले बाटै । गाउँपालिकाके अध्यक्ष गणेश चौधरी आपन जन्मदिनमे रुख्वा लगैना ओ ओम्ने आपन नाउँ लिख्ना कार्यक्रम सुरु कैके पालिकाहे हरित पालिका बनैना सहज हुइना बटैलै ।
उहाँ हरेक नागरिकहे आपन जन्मोत्सवमे रुख्वा लगैना आग्रह करले बाटै । ‘वन वातावरण संरक्षण सबके दायित्व हो, जन्मदिनमे कम्तीमे दुई–चार रुख्वा लगाइ सेक्लेसे फेन वातावरण संरक्षणमे जिम्मेवार बनाइ’, उहाँ कहलै । ‘आपन लगाइल रुख्वा संरक्षण कैना फेन मन लागठ् । ओहेमारे रुख्वा लगैना अनुरोध करले बाटी । इ कार्यमे पालिकाके सक्कु नागरिक सहभागी हुइना आश करले बाटी ।’
