कैलारी गाउँपालिकाके एघारो गाउँसभा अधिवेशन सम्पन्न

पहुरा समाचारदाता
हसुलिया, २० असार । कैलारी गाउपालिकाके एघारो गाउँसभा (बर्षे ÷ बजेट) अधिवेशन सोम्मार सम्पन्न हुइल बा ।
गाउँपालिका अध्यक्ष राजसमझ चौधरीके अध्यक्षतामे हुइल टिसरा सभा तथा एघारौ गाउँसभा अधिवेशनसे नीति तथा कार्यक्रम ओ बजेट तथा कार्यक्रम अनुमोदन हुइल बा । गाउँपालिका अध्यक्षसे सभामे प्रस्तुत करल नीतिगत निर्णयहे तालि बजाके अनुमोदन कैगिल रहे ।

गाउँसभासे हुइल नीतिगत निर्णय चालू आर्थिक वर्षके जेष्ठ मसान्तसमके आय व्यय अनुमोदन हुइल बा । कार्यपालिकासे हुइल करल निर्णय अनुमोदन ऐन, नियम निर्देशिका, कार्यविधि निर्माणके अधिकार कार्यपालिका प्रत्यायोजन, स्वीकृत बजेट तथा कार्यक्रममे संसोधन कैना अधिकार कार्यपालिकामे प्रत्यायोजन करल बा ।

ओस्टेक राजश्व परामर्श समितिसे निर्धारण करल करके दर तथा दायरा लागु कैना, निर्माण सम्पन्न योजनाके जाँचपास तथा फरफारक, संघीय तथा प्रदेश सरकारमे योजना माग, संघीय तथा प्रदेश सरकार ओ विकास साझेदारसंग समन्वय, कर्मचारीके तलवी प्रतिवेदन अनुमोदन हुइल बा ।

टिसरा सभा तथा एघारौ गाउँसभा अधिवेशनसे सेवा करारके कर्मचारीके सेवा करार (म्याद), सेवा, सुविधा सम्बन्धी अधिकार कार्यपालिकामे प्रत्यायोजन करटी आवश्यक मात्रमे ठप्न कहल बा । सभासे कर्मचारी संगठन व्यवस्थापन सम्बन्धमे, लेखा परिक्षण प्रतिवेदनफे अनुमोदन करले बा ।

सभाहे सम्बोधन करटी गाउँपालिका उपाध्यक्ष भगवतीकुमारी चौधरी एघारौ गाउँसभा अधिवेशनसे अनुमोदन हुइल नीति तथा कार्यक्रम ओ बजेट तथा कार्यक्रम कार्यान्वयन हुई पर्नामे विश्वास व्यक्त करली ।

सभाहे समापन करटी सभाके अध्यक्ष राजसमझ चौधरी गाउँपालिकामे कृषि, शिक्षा, स्वास्थ्य, भौतिक पूर्वाधारमे अब्बे विशेष जोड डेना बटैलै । एघारो गाउँसभा अधिवेशनसे अनुमोदन हुइल नीति तथा कार्यक्रम ओ बजेट तथा कार्यक्रम असार २६ गते सार्वजनिकीकरण कैना बटैलै । गाउँसभामे कार्यपालिकाका सदस्य, प्रमुख प्रशासकीय अधिकृत विरबहादर ऐर, गाउँपालिकाके कर्मचारीहुकनके उपस्थिति रहल रहे ।