उद्यमीहे स्थानीय सरकार सहयोग करे पर्ना जोर
पहुरा समाचारदाता
धनगढी, २० असार । सुरक्षित आप्रवासन(सामी) परियोजना अन्तर्गत वित्तीय साक्षरता ओ मनोसामजिक परामर्श कक्षाके सहभागीनहे उद्यमशिलता विकास सम्बन्धी ७ दिने आधारभूत तालिम सोम्मारके धनगढीमे ओराइल बा ।
धनगढी उपमहानगरपालिका कैलाली, हेल्भेटास नेपाल ओ सामी परियोजनाके संयोजन तथा डिप्रोक्स नेपालके आयोजनामा हुइल तालिमके सहभागीहुक्रे उद्यम व्यवसाय करुइया उद्यमीहे स्थानीय सरकार आवश्यक सहयोग करे पर्ना बटैले बाटै ।
तालिममे सहभागी संगीता मगर ७ दिने तालिममे अपने उद्यम सम्बन्धी ढिउर चीज सिकल बटैले बटी । उहाँ तालिममेउद्यम व्यवसाय, बजारीकरण, लगानी तथा उद्यम व्यवसायसे आइल पैसाहे बचतसे लेके सही ठाउँमे सदुपयोग कैना बारे समेत जाने पाइल बटैली । यकर साथे उहाँ गरिव तथा विपन्न ओ पुँजी नैरहिके उद्यम करे नैसेकल उद्यमीहे स्थानीय सरकारसे तालिम लगायत उद्यम व्यवसाय कैना सहयोग करे पर्ना बटैली ।
तालिमके औरे सहभागी आरती राना मजा उद्यम करटी रहल उद्यमीहे स्थानीय सरकारसे अनुदान सहयोग तथा प्रोत्साहन करे पर्ना बटाइल रही । साथे उहाँ स्थानीय सरकार असल उद्यमीहे पहिचान कैके अनुदान सहयोग लगायत दक्षता वृद्धिके तालिम डेहे पर्ना औँल्याइली ।
कार्यक्रममे सुरक्षित आप्रवासन (सामी) परियोजनाके वैदेशिक रोजगार बोर्ड कार्यक्रम अधिकृत लक्ष्मी चौधरी छोट छोट व्यापार व्यवसाय तथा उद्यम सञ्चालन रहल उद्यमी व्यवसायीहे वित्तीय साक्षरतासँगे व्यवसायमुखी बनैना उद्देश्यसे तालिम सञ्चालन करल बटैली । यरक साथृे उहाँ तालिममे सहभागीहुक्रनहे उद्यम तथा व्यापार व्यवसाय ओ बजारीकरणबारे जानकारी हुइल बारे अपने विश्वस्त हुइटी तालिममे सिकल चीज व्यवहारमे लागू कैना फेन आग्रह करल रही ।
कार्यक्रममे धनगढी उपमहानगरपालिकाके सामाजिक विकास अधिकृत टंक विष्ट स्थानीय स्तरमे रहल स्रोत साधनके ढिउरसे ढिउर प्रयोग कैके उद्यम व्यवसाय कैना आवश्यक रहल बटाइल रहिट । यकर साथे उहाँ उद्यम व्यवसाय करेबर उद्यमी आपन उद्यम व्यवसायके योजना बनाके किल उद्यम सञ्चालन करे पर्ना आग्रह करल रहिट । साथे उहाँ उद्यमीके लाग तालिम तथा अनुदान सहयोगके कार्यक्रम उपमहानगरपालिकासे सञ्चालन कैटी आइल फेन बटाइल रहिट ।
तालिममे धनगढी उपमहानगरपालिकाके वडा नम्बर ६, ९, १०, ११, १४, १८ ओ १९ के २० जनहनके सहभागिता रहल रहल रहे । तालिमके प्रशिक्षक जुना केसी, सिद्धि शिवाकोटी ओ निल प्रसाद गौतम प्रशिक्षण डेहल रहिट ।
