बजेट बहुमतसे पास, उपप्रमुखके असहमति
पहुरा समाचारदाता
धनगढी, २० असार । धनगढी उपमहानगरपालिकाके आठौं नगरसभाके टिसरा बैठकसे बहुतमतसे आर्थिक बर्ष २०७९/०८० के लाग नानल बजेट पास हुइल बा ।
नगरसभामे काँग्रेसके ११ वडा अध्यक्ष ओ उ पार्टीले निर्वाचित हुइल सदस्यहुक्रे तालि बजाइपाछे नगरप्रमुख गोपाल हमाल बहुमत डेखलपाछे बजेट पास हुइल घोषणा करल रहिट । मने उपप्रमुख कन्दकला राना भर बजेट पास करलमे अपन सहमति नइरहल बटैले बटी ।
धनगढी उपमहानगरपालिकाके १९ वडामे ११ वडामे काँग्रेस, ६ वडामे एमाले ओ २ वडामे माओवादी केन्द्र विजय हुइल बा । उहेसे आघे बैठकमे उपमेयर कन्दकला राना बजेट पुस्तिका प्रकाशनमे अपनहे सहभागी नैकराइल कटि विरोध जनाइलओरसे विवाद उत्पन्न हुइल हो ।
अगामी आर्थिक वर्ष २०७९/८० के लाग नानल बजेटउप्पर छलफल करना सोम्मार बैठल नगरसभा बैठकमे विवाद उत्पन्न हुइल हो । उपमेयर राना सभामे अपनसँग मेयर गोपाल हमाल समन्वय नैकर गुनासो करले रहैं । मने, हमाल भर बजेट निर्माणमे उपमेयरके फेन भूमिका रहल स्मरण करैले रहैं । रानासे उठाइल प्रश्नके जवाफ डेटि मेयर हमाल योजना शाखाके विज्ञहुक्रे बजेट ओ योजना निर्माण करल बटैटि अपन संलग्नता ओ कौनो स्वार्थ नैरहल बटैले रहैं । ओस्टेके, कर्मचारी फेन अपनहे हेपल उपमेयर रानाके गुनासो बा । राना नगरसभा नैचले डेना चेतावनी डेले रहि । उहाँक चेतावनीपाछे एमाले ओ माओवादीसे निर्वाचित नगरसभा सदस्यहुक्रे कुर्सी फालाफाल करले रहैं । काँग्रेस पक्ष भर मेयर बजेट पुस्तिकामे समर्थन जनैले बटैं ।
धनगढी उपमहानगरपालिका यिहे असार १० गते आर्थिक वर्ष २०७९/०८० के लाग १ अर्ब ८३ करोड ८९ लाख २४ हजार बराबरके बजेट पेश करले रहे ।
सम्बन्धित समाचार
