प्रदेश किशोर/किशोरी स्वास्थ्य प्रवर्द्धन ताराके उपाधि स्मृति ओ प्रकाशहे
पहुरा समाचारदाता
धनगढी, २१ असार । ‘प्रदेश किशोर/किशोरी स्वास्थ्य प्रवर्द्धन तारा’ के उपाधि धनगढी उपमहानगरपालिका वडा नम्बर ५ कैलालीके स्मृति शाही ओ मेलौली नगरपालिका वडा नम्बर २ बैतडीके प्रकाश बडू जिटले बटैं ।
शाही धनगढीस्थित नाष्ट माध्यमिक विद्यालय कक्षा १२ मे अध्ययनरत विद्यार्थी हुइटि करलेसे बडू बैतडीके दुर्गास्थानस्थित केदारेश्वर मावि कक्षा १० मे अध्ययनरत विद्यार्थी हुइँट् ।
सामाजिक विकास मन्त्रालय, प्रादेशिक स्वास्थ्य प्रवर्द्धन केन्द्र कञ्चनपुरके आयोजनामे धनगढीमे आज सम्पन्न हुइल टमान विद्याके स्पर्धामे शाही ओ बडू उत्कृष्ट होके ‘प्रदेश स्वास्थ्य प्रवर्द्धन तारा’ जिटल हुइँट् । उ प्रतियोगितामे सुदूरपश्चिम प्रदेशभरसे १८ जहनके सहभागिता रहल रहे ।
उपाधि पाइल डुनु जहनहे सुदूरपश्चिम प्रदेश सामाजिक विकास राज्यमन्त्री टेकबहादुर रैका एक समारोहके बीच ट्रफी, सम्मानपत्र ओ नगद २५/२५ हजारसहित पुस्कृत करले रहैं ।
कार्यक्रममे राज्यमन्त्री रैका किशोरावस्थामे सकारात्मक विचार तथा मजा संगतमे लागे परनामे बटैले रहैं । उहाँ किशोर/किशोरीहुकनके उज्ज्वल भविष्यके लाग सकारात्मक विचार तथा मजा संगतमे लागे परना आवश्यक रहल बटैलैं ।
कार्यक्रममे सामाजिक विकास मन्त्रालय प्रदेश सचिव दीपक लामिछाने, जनस्वास्थ्य कार्यालय कञ्चनपुरके प्रमुख शिवराज सुनारलगायत मन्तव्य व्यक्त करले रहैं ।
कार्यक्रममे किशोरावस्था समस्या, चुनौती ओ समाधान विषयमे समूह छलफल ओ प्रस्तुति, स्वास्थ्य जीवनशैली, स्वास्थ्य व्यवहार, स्वास्थ्य विकासके आधार आदि विषयमे वहस, किशोर/किशोरी स्वास्थ्य प्रवर्द्धन तथा राजनीतिक ओ विकास विषयक प्यानल छलफल, ‘करि किशोर/किशोरीके स्वास्थ्यमे लगानी, पाइ स्वास्थ्य जिन्दगानी’ विषयक वक्तित्वकला, किशोर/किशोरी व्यक्तिगत प्रतीभा कार्यक्रम हुइल रहे ।
छनौट कार्यक्रममे कानून अधिकृत दानबहादुर सुनार, जनस्वास्थ्यविज्ञ शंकर धामी ओ समाजशास्त्रविद् शेरबहादुर विष्ट निर्णायक रहैं कलेसे केन्द्रके प्रमुख हेमराज खड्का ओ दीपा रावत सहजकर्ता रहल रहैं । कार्यक्रम केन्द्रके प्रमुख खड्काके अध्यक्षतामे हुइल रहे ।
सम्बन्धित समाचार
