कैलारी गाउँपालिकाके सार्वजनिक सुनुवाई

पहुरा समाचारदाता
हसुलिया, २१ असार । कैलारी गाउँपालिकाके सार्वजनिक सुनुवाई कार्यक्रम हुइल बा ।

गाउँपालिकाके आयोजनामे प्रादेशिक सुशासन केन्द्र पुन्ना डोटीके सहयोग ओ नेपाल पत्रकार महासंघ कैलालीके सहजीकरणमे आर्थिक वर्ष २०७८÷२०७९ सालमे सेवामे प्रवाह, ओ विकास निर्माणबारे सार्वजनिक सुनुवाई कार्यक्रम हुइल हो । कार्यक्रममे गाउँपालिका अध्यक्ष राजसमझ चौधरी गैल बरसके मजा ओ अधुरा योजनाहे प्रथामिकता डेना बटैलै । उहाँ कहलै, कैलारी गाउँपालिका बाढके डुबान क्षेत्र रहल ओरसे तटबन्ध ओ भौतिक पूर्वाधारमे ध्यान डेजाई । यहाँ स्वास्थ्य, शिक्षा, कृषि, यातायात, खानेपानीके क्षेत्रमे ढेर काम करे पर्ना बाँकी रहल ओरसे गाउँपालिकामे १५ शैयाके अस्पताल हाली निर्माण हुइना उहाँ बटैलै । किसानहुकन सिचाई सुविधाके लाग कृषि विद्युतीय मिटरके लाग पहलफे हुइटी रहल अध्यक्ष बटैलै ।

गाउँपालिका उपाध्यक्ष भगवतीकुमारी चौधरी गाउँपालिकासे टमान व्यापारव्यासहे करके दायरामे नन्ना बटैली । गाउँपालिकासे भुमिकर ५० प्रतिशत घटाइल मने और चिजमे करके दायराफे बह्रैना बटैले बटी । ओस्टेक उहाँ समाजमे महिलाहुक्रे शोषित अवस्थामे रहल ओरसे क्षमताके विकासके लाग तालिम संचालन आवश्यक रहल बटैली ।

गाउँपालिकाके प्रवक्ता तथा वडा नम्बर ७ के अध्यक्ष दिपेन्द्रबहादुर बम सेवाग्राहीहुकन सूचनाके जानकारीके लाग प्रत्येक वडा कार्यालयमे डिजिटर सूचना बोर्ड धारे पर्नामे जोर डेले बटै । उहाँ कर्मचारीहुकनके समयमे कार्यालयमे आके सेवा प्रदान करे पर्नाफे बटैलै ।

वडा नम्बर ५ अध्यक्ष विष्णु प्रसाद चौधरी मलपोत कर चर्को हुइल जनगुनासो आइलपाछे ५० प्रतिशत भूमिकर घटाइल बटैलै । गाउँपालिकामे टमान तालटलैया, सामुदायिक वनके स्रोत रहल मने प्रणालीगत ढंङसे व्यवस्था हुई नइसेकल बटैलै । पालिकामे कार्यदल गठन करके ओकर व्यवस्थापन कैनाफे उहाँ जनैलै ।

स्थानीयबासी नविन बोहरा गाउँपालिकामे १५ शैयाके अस्पताल, बहुमुखी क्याम्पस, अधुरा झोलुङे पुल, सर्वसाधारणमे सूचनाके पहुँच, कर्मचारीसे हालहाली सेवासुविधा प्रदान कैना बाटमे जोर डेहल रहिट । गाउँपालिकाके विकासके लाग शिक्षामे लगानी कैनाफे उहाँ बटैले रहिट ।

कार्यक्रममे गाउँपालिकाके प्रमुख प्रशासकीय अधिकृत विरबहादुर ऐर आर्थिक वर्ष २०७८÷२०७९ सालमे सेवामे प्रवाह, ओ विकास निर्माणबारे जानकारी डेहल रहिट । कार्यक्रममे सहजीकरण अग्रह पत्रकार मनमोहन स्वाँर ओ स्वागत मन्तव्य नेपाल पत्रकार महासंघ कैलालीके अध्यक्ष हिमालय जोशी करले रहिट ।

कार्यक्रममे कैलारी गाउँपालिकाके १ से ९ वडाके अध्यक्ष, कार्यपालिका सदस्य, पालिकाके टमान शाखाके प्रमुख, कर्मचारी, सेवाग्राहीहुकनके सहभागिता रहल रहे ।