मेयर हमाल अपन चिहुर्ना गाडी वडा क्लिनिकके लाग डेलै

पहुरा समाचारदाता
धनगढी, २२ असार । धनगढी उपमहानगरपालिकाके नगरप्रमुख गोपाल हमाल अपन चिहुर्ना गाडी वडा क्लिनिकहे हस्तान्तरण करले बटै ।

यिहे सावन महिनासे उपमहानगरपालिकाके १९ वडामे दुई जाने विशेषज्ञ डाक्टरसहित संचालन हुइना निशुल्क वडा क्लििनिकके लाग अपन चिहुरना गाडी नगरप्रमुख हमाल हस्तान्तरण करल हुइट । पालिकाके सक्कु वडामे संचालन हुइना वडा क्लिनिकके काममे सहयोग पुगे कहटी लक्ष्मीनारायण मन्दिरके स्वामी १००८ देवराज आचार्य मार्फत नगरपालिकाके स्वास्थ्य शाखा प्रमुख कृष्णबहादुर बोहराहे बुधके रोज चावी हस्तान्तरण कैगिल बा ।

निशुल्क वडा क्लििनिक सेवा प्रत्येक महिनाके एक दिन एक वडामे क्यालेन्डर अनुसारके सेवा सुचारु करे लागल नगरप्रमुख हमाल बटैलै । उ शिविरमे एक जाने विशेषज्ञ डाक्टर ओ जाने गाइनोग्लोजिष्टमार्फत अल्ट्रसाउण्ड, इसिजी, रगतजाँच निःशुल्क कैजैना कहल बा ।

निशुल्क वडा क्लििनिक सेवासे स्वास्थ्यमे खर्च हुइना ढेर पैसा बची,’ बची, मेयर कहलै, ‘जनता प्रत्येक महिना स्वास्थ्यके लाग ढाईसे तीन हजार खर्च करे परठ । आब सयममे रोगके पहिचान हुई । औषधि उपचारसे बन्चित मनै अपन घरदैलो सेवा पैही । भारी धनजन हुइनासे जोगजाई ।’

उहाँ कहलै, ‘यी मोडेल नेपालमे पहिल हो । यी योजना यहाँ सफल हुइलेसे और पालिकामे लागु करे सेक्ही । काल्ह हमार साधन स्रोतसे भ्याइलेसे ठप सेवा सुविधा प्रदान कैटी जैबी ।’

यूएनडिपीके बैठकमेफे और पालिकामे अस्टे सेवा लाग करेक लाग साझेदारीके काम कैना आग्रह समेट करल नगरप्रमुख हमाल बटैलै । हमार धनगढी हम्रे बनाब अभियान अनुसार काम आघे बह्रटा । भातभटेनी दुई ठो विशेषज्ञ डाक्टरके तलब भत्ता व्यहोर्ना, कुछ इकुपमेन्ट सामाजिक विकास मन्त्रालयसे डेले बा, नगर प्रमुख हमाल कहलै ।

सेवा सावनसे सुचारु करेक लाग डाक्टरके विज्ञापनफे निकारल मेयर बटैलै । धनगढी उपहानगरपालिकाके यी योजना सफल हुइलेसे और पालिकासे यी कार्यक्रम लागु कैना ओ ग्रामीण स्वास्थ्य बल्गर हुइना उहाँ बटैलै ।

धनगढी उपमहानगरपालिका स्वास्थ्य शाखा प्रमुख कृष्णबहादुर बोहरा एक जाने विशेषज्ञ फिजिशियन ओ एक जाने गाइनोलोजिष्ट महिला विशेषज्ञ डाक्टरसे सेवा डेना बटैलै ।

प्रत्येक वडामे तोकल समयमे जाके वृद्धवृद्धा, महिला, बालबालिका, गर्भवती महिलाहुकन सेवा प्रदान कैजाई,’ उहाँ कहलै, ‘स्वास्थ्य जाँच संगे आवश्यक पर्ना औषधिफे उपलब्ध कैना, सिरियस केस रहलेसे सेती अस्पतालमे रेफर कैजाई । उहाँ कहलै, वडास्तरमे घरदैलामे सेवा डेना कहिके बनाइल सयन्त्र हो । अब्बे महिनामे एक चो सेवा डेना कहल बा । पाछे १५ दिनमे, एक हप्तामे एक दिन सेवा कहल बा ।’