विकास निर्माण सम्पन्न योजनाके अनुगमन

पहुरा समाचारदाता
हसुलिया, २२ असार । कैलालीके कैलारी गाउँपालिकामे विकास निर्माणके सम्पन्न योजनाके गाउँपालिका स्तरीय अनुगमन समुहसे अनुगमन करले बा ।

गाउँपालिका उपाध्यक्ष तथा अनुगमन समिति संयोजक भगवतीकुमारी चौधरी सहित प्राविधिक टोली बुधके रोज सम्पन्न योजनाके स्थलगत अनुगमन करल हो । गाउँपालिका स्तरीय अनुगमन समुहसे आर्थिक वर्ष २०७८÷७९ के बजेटसे पालिकाके टमान वडामे सञ्चालित निर्माण हुइल योजनाके गुणस्तर हुइल÷नहुइल बारेमे अनुगमन करल समिति संयोजक भगवतीकुमारी चौधरी बटैली ।

गाउँपालिका स्तरीय अनुगमन समुहसे कैलारी गाउँपालिका वडा नम्बर ५ बैसपुरमे रहल न्यू प्रसंशा यूवा क्लव भवनके अनुगमन करले बा । यी भवन निर्माणके लाग प्रदेश पूर्वाधर विकास कार्यक्रम अन्र्तगत १० लाख ३ हजार बजेट छुटयाइल रहे ।
ओस्टेक करके कैलारी गाउँपालिका वडा नम्बर १ केगाउँस्थित खुशीराम टे«डर्ससे कैलारी सहकारीसम माटी पटानी, होमपाइप जडान, ग्राभेलिङके अनुगमन करल बा । प्रदेश पूर्वाधार विकास कार्यक्रम अन्र्तगत ५ लाख २ हजार बजेटमे यी योजना सम्पन्न हुइल बा ।

अनुगमन समुहसे वडा नम्बर ४ के गाउँ पश्चिम खेदा टोलसे अमरटोल हुइटी विरबहादुरके घरसम सडक स्तरोन्नतीके अनुगमन करले बा । प्रदेश पूर्वाधार विकास कार्यक्रम अन्र्तगत १३ लाख ४ हजार बजेटमे सडक स्तरोन्नतीके काम हुइल बा । तिनु योजनाके अनुगमन करेबेर भौतिक रुपमे सम्पन्न डेखल अनुगमन समितिके सदस्य सचिव तथा योजना शाखा प्रमुख सन्तोषकुमार चौधरी बटैलै ।

निर्मानाधिन ३३ ठो योजना सम्पन्न हुइना क्रममे रहल, प्रधानमन्त्री स्वरोजगार कार्यक्रमके सक्कु योजना सम्पन्न हुके भुक्तानी प्रक्रियामे रहल शाखा प्रमुख चौधरी बटैलै ।

अनुगमन टोलीमे गाउँपालिका उपाध्यक्ष तथा अनुगमन समिति संयोजक भगवतीकुमारी चौधरी, सदस्य सचिव सन्तोषकुमार चौधरी, पूर्वाधार विकास समिति संयोजक तथा वडा नम्बर ६ के अध्यक्ष प्रेमबहादुर चौधरी, वडा नम्बर ९ के अध्यक्ष खेमराज चौधरी, प्राविधिक अस्सिटेन्ट सवइन्जिनियर संजय कठरियाके सहभागिता रहल रहे ।

ओस्टेक सम्बन्धित वडामे योजनाके अनुगमन करेबेर आर्थिक विकास समिति संयोजक तथा वडा नम्बर ५ के अध्यक्ष विष्णुप्रसाद चौधरी, न्यायिक समिति सदस्य तथा वडा नम्बर १ के अध्यक्ष धोजहरिपाल बोहरा, वन वातावरण विपद व्यवस्थापन समितिके संयोजक वडा नम्बर ४ के अध्यक्ष ठागुराम चौधरीके फे अनुगमनमे सहभागिता रहल रहे ।