सुदूरपश्चिममे ४३ प्रतिशत लर्का कुपोषित
पहुरा समाचारदाता
धनगढी, २७ असार । सुदूरपश्चिम प्रदेशमे ४३ प्रतिशत लर्का कुपोषित रहल एक कार्यक्रममे बटागिल बा ।
स्वास्थ्य कार्यालय कैलालीके आयोजनामे अँटवारके रोज धनगढीमे ‘बहुक्षेत्रीय पोषण योजना’ सम्बन्धी कार्यक्रममे स्वास्थ्य कार्यालयके प्रमुख लालबहादुर धामी पोषण यो यकर अवस्था बारे कार्यपत्र प्रस्तुत करटी सुदूरपश्चिम प्रदेशमे ४३ प्रतिशत बालबालिका कुपोषित रहल जनैलै ।
नेपाल भर कुषोषित बालकालिकाके तथ्याङक जम्मा ४१ प्रतिशत रहल मने यी प्रदेशमे उहीसे ढेर रहल उहाँ बटैलै । दिगो विकास लक्ष्यमे सन २०३० सम १५ प्रतिशमे झरना लक्ष्य लेके काम हुइटी रहल उहाँ उहाँ बटैलै ।
पोषणके कमीसे सुदूरपश्चिममे ३६ प्रतिशतमे पुड्कोपन विल्गैना करल ओ सन २०३० सम नेपालमे पुड्कोपन १५ प्रतिशतमे झरना लक्ष्य रहल धामी बटैलै । ओस्टेक सुदूरपश्चिममे ख्याउटेपना अब्बे १४ प्रतिशत रहल बा कलेसे २०३० सम ४ प्रतिशतमे भरना लक्ष्य रहल कार्यालय प्रमुख धामीसे कार्यपत्रमे उल्लेख करले बटै । सुदूरपश्चिम प्रदेशमे रक्तअल्पताफे डर लग्टी अवस्थामे रहल बा । ३९ प्रतिशतमे रक्तअल्पता हुइना करल उहाँ जनैलै । कार्यालय प्रमुख धामीसे प्रस्तुत करल कार्यपत्रमे स्वस्थ शिशु जलमना समयमे २ किलो पाँच सय ग्राम हुई पर्ना उल्लेख करल बा ।
कार्यक्रममे युनिसेफके पोषण अधिकृत प्रकाशचन्द्र जोशी बहुक्षेत्रीय पोषण योजनाके बारेमे कार्यपत्र प्रस्तुत करटी पोषणमे लगानी नइबढाइटसम बाल मृत्युदर कमी आई नइसेक्ना बटैलै । उहाँ कहलै, हम्रे भारी मनै जा खैठी लर्कनफे उहे खवैना प्रचलन बा । लर्कनके अलग खाना नइपकाइल कारण लर्का चाहल जैसिन पोषण पाई नइसेक्ठै । पाचन शक्तिमे समस्या विल्गाइठ ।’ पोषणमे सुधार नानेक लाग उमेर अनुसार खाना पकाई पर्ना जरुरी रहलफे पोषण अधिकृत जोशी बटैलै ।
नेपालमे १ हजार लर्का जलम लेहेबेर ३९ प्रतिशत बालबालिका अपन पाँचौ जलम दिन मनाई नइपाइल, ३०/३२ जाने पहिल जलम दिन मनाई नइपाइल उहाँ बटैलै । ढेर जैसिन स्थानीय तहमे पोषणमे छुट्याइल बजेट समेत खर्च नइहुइना करल ओरसे स्थानीय सरकारसे पोषणमे लगानी लगैना जोड डेलै ।
कार्यक्रममे धनगढी उपमहानगरपालिका मेयर गोपाल हमाल जनतामे पोषणके बारेमे चासो नइरहल बटैलै । ‘निर्वाचनके बेला टमान ठाउँमे जैना क्रममे सडक, भवन चाहल कना ढेर भेटलै, उहाँ कहलैं, ‘मने पोषणके बारेमे कुहीहे चासो नइहो । मागफे कहुसे नइआइठ ।’ जनतसे माग नइहुइलेसे योजनामे नपर्ना करल उहाँ उल्लेख करलै । ‘नागरिकहुक्रे स्वस्थ हुइ सेक्लेसे केल समृद्धिके परिकल्पना करे सेक्जाई, उहाँ कहलै ‘स्वास्थ्यमे लगानी आवश्यक बा ।’
कार्यक्रममे स्थानीय तहके जनप्रतिनिधि, नागरिक समाज ओ टमान संघ संस्थाहुकनके प्रमुख एवं प्रतिनिधिके सहभागिता रहल रहे ।
