डोटी पूर्णखोप सुनिश्चितता जिल्ला घोषणा

पहुरा समाचारदाता
डोटी, २७ असार । डोटी पूर्णखोप सुनिश्चितता तथा दिगोपना घोषणा हुइल बा । सोम्मारके रोज सुदूरपश्चिम प्रदेशके सामाजिक विकास राज्यमन्त्री टेकबहादुर रैका एक समारोहके बीच डोटीहे पूर्णखोप सुनिश्चितता तथा दिगोपना घोषणा करलैं । कार्यक्रममे राज्यमन्त्री रैका प्रदेश सरकार स्वास्थ्य क्षेत्रहे पहिल प्राथमिकतामे ढैके कार्यक्रम सञ्चालन करल बटैलैं ।

जिल्लाके सक्कु नौठो स्थानीय तहहे पूर्णखोप सुनिश्चितता तथा दिगोपना घोषणा करल हो । असार १५ गते बोगटान फुड्सिल गाउँपालिकासे सुरु होके असार २२ गते पूर्वीचौकी गाउँपालिकाहे घोषणा कार्यक्रम हुइल रहे ।

१५ महिनाभित्रे बालबालिकाहे १३ ठो रोगविरूद्धके टमान १४ ठो खोप लगाइ परना स्वास्थ्य कार्यालय डोटीके प्रमुख तथा जिल्ला पूर्णखोप समन्वय समितिके सदस्य सचिव डिल्लीरमण जोशी जानकारी डेलैं । डोटीके २ सय ४८ ठो खोप केन्द्रसे खोप डेटि रहल स्वास्थ्य कार्यालय जनैले बा । डोटीके ३ हजार ८६ बालबालिकाहे खोपके सुनिश्चितता कैके कार्यक्रमके घोषणा करल जोशी बटैलैं ।

कार्यक्रममे जिल्ला समन्वय समिति एवं जिल्ला पूर्णखोप समन्वय समितिके संयोजक लक्ष्मण सिंह जिल्ला पूर्णखोप घोषणाके लाग सहयोग करल सक्कु निकायहे धन्यवाद व्यक्त करले रहैं ।